ഇന്ത്യയെ ഹൈജാക്ക് ചെയ്യാൻ ക്രിമിനൽ ഗൂഢാലോചന; അവരെ നിയമത്തിന് മുന്നിൽ കൊണ്ടുവരും, ഇതാണ് ഗ്യാരണ്ടി: രാഹുൽ ഗാന്ധി

ന്യൂഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരായ പ്രതിപക്ഷ പ്രതിഷേധം ശക്തമായി തുടരുമെന്ന് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. കേന്ദ്ര സർക്കാരും തിരഞ്ഞെടുപ്പ് കമ്മീഷനും ചേർന്ന് ഇന്ത്യയിലെ ജനാധിപത്യ സംവിധാനത്തെ ഹൈജാക്ക് ചെയ്യുകയാണെന്നും വോട്ട് മോഷണം നടത്തിയെന്നും അദ്ദേഹം ആരോപിച്ചു. പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത് ഷാ, ഗ്യാനേഷ് കുമാർ, ആർ.എസ്.എസ് മേധാവി മോഹൻ ഭാഗവത് എന്നിവർ ചേർന്ന് ആസൂത്രിതമായ ക്രിമിനൽ ഗൂഢാലോചനയാണ് നടത്തുന്നതെന്നും ഇവരെ നിയമത്തിന് മുന്നിൽ കൊണ്ടുവരുമെന്നും രാഹുൽ ഗാന്ധി പറഞ്ഞു.

“300-ഓളം എം.പിമാർ സമാധാനപരമായി പ്രതിഷേധിക്കാനാണ് ശ്രമിക്കുന്നത്. എന്നാൽ കഴിഞ്ഞ രണ്ട് ദിവസമായി ഞങ്ങളെ അതിന് അനുവദിക്കുന്നില്ല. ആദ്യ ദിവസം തിരഞ്ഞെടുപ്പ് കമ്മീഷൻ ഓഫീസിന് മുന്നിൽ വെച്ച് ഞങ്ങളെ തടഞ്ഞു. തൊട്ടടുത്ത ദിവസം ജന്തർ മന്ദിറിന് സമീപം വെച്ച് തടയുകയും ഞങ്ങളുടെ ആളുകളെ മർദിക്കുകയും ചെയ്തു. നരേന്ദ്ര മോദിയും അമിത് ഷായും ഗ്യാനേഷ് കുമാറും മോഹൻ ഭാഗവതും ചേർന്ന് ക്രിമിനൽ ഗൂഢാലോചനയിലൂടെ രാജ്യത്തെ ഹൈജാക്ക് ചെയ്യുകയാണ്. ഭരണഘടനയെ തകർക്കുകയാണ്. ഇതിനെതിരെ ശക്തമായ നടപടിയുണ്ടാകും, അവരെ നിയമത്തിന് മുന്നിൽ കൊണ്ടുവരും. ഇതാണ് ഞങ്ങളുടെ ഗ്യാരണ്ടി,” – രാഹുൽ ഗാന്ധി വ്യക്തമാക്കി.

അതേസമയം, ബി.ജെ.പി സർക്കാരിനും പ്രധാനമന്ത്രി നരേന്ദ്ര മോദിക്കും ആഭ്യന്തര മന്ത്രി അമിത് ഷായ്ക്കും നല്ല ബുദ്ധി തോന്നാനായി രാജ്ഘട്ടിൽ പ്രാർത്ഥന നടത്തുമെന്ന് എ.ഐ.സി.സി അധ്യക്ഷൻ മല്ലികാർജുൻ ഖാർഗെ പറഞ്ഞു. ഭരണാധികാരികളുടെ പ്രവൃത്തികൾ രാജ്യതാൽപ്പര്യത്തിന് വിരുദ്ധമാണെന്ന് അവർ തിരിച്ചറിയണം. വോട്ട് മോഷണമായാലും വിലക്കയറ്റമായാലും യുവാക്കളുടെ പ്രശ്നങ്ങളായാലും നിലവിലെ പ്രതിസന്ധികൾ ജനങ്ങൾക്ക് എതിരാണ്. മഹാരഥന്മാർ നേടിത്തന്ന സ്വാതന്ത്ര്യം നശിപ്പിക്കാനാണ് ശ്രമിക്കുന്നതെന്നും ഖാർഗെ കുറ്റപ്പെടുത്തി. പ്രതിപക്ഷ എം.പിമാരുടെ നേതൃത്വത്തിൽ തിരഞ്ഞെടുപ്പ് കമ്മീഷനിലേക്ക് മാർച്ചും ജന്തർ മന്ദിറിന് സമീപം പ്രതിഷേധവും സംഘടിപ്പിച്ചിരുന്നു. ഇതിന്റെ തുടർച്ചയായി ഡൽഹിയിൽ പ്രതിഷേധം മൂന്നാം ദിവസവും തുടരുകയാണ്.

Content Highlights: Leader of the Opposition in the Lok Sabha, Rahul Gandhi, stated that the opposition’s protest against Chief Election Commissioner Gyanesh Kumar would continue unabated. He alleged that the Central Government and the Election Commission have hijacked India’s democratic system and committed vote theft.