ഇറാൻ ഭരണകൂടത്തിൻറെ ‘തായ് വേരറുക്കും’ എന്ന് നെതന്യാഹുവിന്റെ ഭീഷണി

ജറുസലേം: ഇറാൻ ഭരണകൂടത്തെ പൂർണമായി ഉന്മൂലനം ചെയ്യാനുള്ള നടപടികളിൽ പ്രതിജ്ഞാബദ്ധമാണെന്ന് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു. അമേരിക്കൻ പ്രസിഡന്റ് ഡോണൾഡ് ട്രംപുമായി നടത്തിയ ചർച്ചയ്ക്കു പിന്നാലെയാണ് നെതന്യാഹുവിന്റെ പ്രസ്താവന. ട്രംപുമായി സംസാരിച്ചതായും ഇറാൻ ഭരണകൂടത്തെ ഇല്ലാതാക്കുന്നതിന്റെ പ്രാധാന്യം ചർച്ച ചെയ്തതായും അദ്ദേഹത്തിന്റെ ഓഫീസ് പുറത്തിറക്കിയ പ്രസ്താവനയിൽ പറയുന്നു. കഴിഞ്ഞ ദിവസങ്ങളിലും ഇതേ വിഷയം ട്രംപുമായി പലതവണ ചർച്ച ചെയ്തിട്ടുണ്ടെന്നും നെതന്യാഹു വ്യക്തമാക്കി.

ഇതിനിടെ, ഇസ്രയേലിലെത്തിയ അമേരിക്കൻ പ്രതിരോധ മന്ത്രി പീറ്റ് ഹെഗ്സെത്ത് നെതന്യാഹുവുമായി കൂടിക്കാഴ്ച നടത്തി. ഔദ്യോഗിക പ്രഖ്യാപനങ്ങളില്ലാതെ നടന്ന സന്ദർശനത്തിൽ ഇറാനുമായി ബന്ധപ്പെട്ട വിഷയങ്ങൾ ചർച്ചയായതായി ഉദ്യോഗസ്ഥർ സ്ഥിരീകരിച്ചു. പശ്ചിമേഷ്യയിൽ സംഘർഷം വർധിച്ചുവരുന്ന സാഹചര്യത്തിൽ അമേരിക്കയുടെയും ഇസ്രയേലിന്റെയും നീക്കങ്ങൾ നിർണായകമായാണ് വിലയിരുത്തപ്പെടുന്നത്. എന്നാൽ ചർച്ചകളുടെ വിശദാംശങ്ങളോ തുടർനടപടികളെക്കുറിച്ചുള്ള ഔദ്യോഗിക വിവരങ്ങളോ പുറത്തുവിട്ടിട്ടില്ല.

അതേസമയം, ഇറാനെതിരായ ആക്രമണങ്ങളിൽ ഹിസ്ബുല്ല പങ്കുചേർന്നാൽ കനത്ത തിരിച്ചടി നേരിടേണ്ടിവരുമെന്ന് ഇസ്രയേൽ പ്രതിരോധ മന്ത്രി ഇസ്രയേൽ കാറ്റ്സ് മുന്നറിയിപ്പ് നൽകി. ലബനാനിൽനിന്നുള്ള ആക്രമണങ്ങൾ വടക്കൻ ഇസ്രയേലിലെ ജനവാസ മേഖലകളെ ലക്ഷ്യമിട്ടാൽ ബെയ്റൂത്തിന്റെ തെക്കൻ പ്രാന്തപ്രദേശമായ ദാഹിയയിൽ ശക്തമായ തിരിച്ചടി നൽകുമെന്നാണ് ഇസ്രയേൽ സൈന്യം പങ്കുവച്ച പ്രസ്താവനയിൽ വ്യക്തമാക്കിയത്. ഭാവിയിൽ ഇറാൻ നടത്തുന്ന ഏതെങ്കിലും ആക്രമണങ്ങളിൽ ഹിസ്ബുല്ല പങ്കെടുത്താലും സായുധസംഘത്തിന് കനത്ത പ്രഹരം നൽകുമെന്നും കാറ്റ്സ് മുന്നറിയിപ്പ് നൽകി.

ഇതിനു പുറമേ, തെക്കൻ ലബനാനിലെ കൂടുതൽ പ്രദേശങ്ങൾ, പ്രത്യേകിച്ച് ലിറ്റാനി നദിക്ക് സമീപമുള്ള മേഖലകൾ, പിടിച്ചെടുക്കാനും അവ ഇസ്രയേലിന്റെ സുരക്ഷാ മേഖലയോട് ശാശ്വതമായി കൂട്ടിച്ചേർക്കാനും സാധ്യതയുണ്ടെന്ന ഭീഷണിയും കാറ്റ്സ് ഉയർത്തിയിട്ടുണ്ട്. ഇറാൻ, ഇസ്രയേൽ, ഹിസ്ബുല്ല എന്നിവർക്കിടയിലെ സംഘർഷം കൂടുതൽ വ്യാപിക്കാനുള്ള ആശങ്ക നിലനിൽക്കുന്നതിനിടെ, ഈ പ്രസ്താവനകൾ മേഖലയുടെ സുരക്ഷാ സാഹചര്യത്തെ കൂടുതൽ സങ്കീർണമാക്കുകയാണ്.

Content Highlights: Israeli Prime Minister Benjamin Netanyahu has stated that he is committed to measures aimed at the complete elimination of the Iranian regime. This statement follows discussions held with U.S. President Donald Trump. A statement issued by his office confirms that he spoke with Trump and discussed the importance of dismantling the Iranian regime.