എക്കോ ഡോട്ടിന് വില കൂടിയതിന് പിന്നിൽ ആമസോണിന്റെ 220 ബില്യൺ ഡോളർ എഐ പന്തയം

വിലക്കുറവിൽ സ്വന്തമാക്കാവുന്ന ആമസോണിന്റെ എക്കോ ഡോട്ടിന് പെട്ടെന്ന് വില കൂടിയത് ഉപഭോക്താക്കളെ ഞെട്ടിച്ചിരിക്കുകയാണ്. എക്കോ ഡോട്ടിന്റെ വില 60 ശതമാനം ഉയർന്ന് 79.99 ഡോളറിലെത്തി. കിൻഡിൽ, ഫയർ ടിവി, ഈറോ തുടങ്ങിയ ആമസോൺ ഉൽപ്പന്നങ്ങൾക്കും വില വർധിച്ചു. മെമ്മറിയുടെയും സ്റ്റോറേജ് ഘടകങ്ങളുടെയും വിലയിലുണ്ടായ വലിയ വർധനയാണ് വില ഉയർത്താനുള്ള കാരണമെന്നാണ് ആമസോണിന്റെ വിശദീകരണം.

16 ജിബി കിൻഡിലിന്റെ വില 109.99 ഡോളറിൽ നിന്ന് 149.99 ഡോളറായി. കിൻഡിൽ പേപ്പർവൈറ്റ് 159.99ൽ നിന്ന് 199.99 ഡോളറായി. ഫയർ ടിവി സ്റ്റിക്ക് എച്ച്ഡിയുടെ വില 34.99ൽ നിന്ന് 39.99 ഡോളറായപ്പോൾ, ഫയർ ടിവി സ്റ്റിക്ക് 4കെ മാക്സിന്റെ വില 59.99ൽ നിന്ന് 84.99 ഡോളറായി. ഫയർ ടിവി ക്യൂബിന്റെ വിലയും 139.99ൽ നിന്ന് 199.99 ഡോളറായി. ഈറോയുടെ നെറ്റ്‌വർക്കിങ് ഉപകരണങ്ങൾക്കും വില പുനർനിശ്ചയിച്ചു. മെമ്മറി വില ഉയർന്നത് ആമസോണിന് മാത്രമല്ല, ഉപഭോക്തൃ ഇലക്ട്രോണിക്സ് മേഖലയിലെ മുഴുവൻ കമ്പനികളും നേരിടുന്ന പ്രശ്നമാണെന്നും റിപ്പോർട്ടിൽ പറയുന്നു.

എന്നാൽ ഇതിന് പിന്നിലെ പ്രധാന കാരണങ്ങളിലൊന്ന് മറ്റൊന്നാണ്. എഐ അടിസ്ഥാന സൗകര്യങ്ങൾക്കായി ആമസോൺ ഈ വർഷം ഏകദേശം 220 ബില്യൺ ഡോളർ ചെലവഴിക്കുന്നുണ്ട്. വലിയ എഐ മോഡലുകളുടെ പരിശീലനത്തിനും പ്രവർത്തനത്തിനും വൻതോതിൽ ഹൈ-ബാൻഡ്‌വിഡ്ത്ത് മെമ്മറി ആവശ്യമാണ്. ഡാറ്റാ സെന്ററുകൾക്കായി വൻതോതിൽ മെമ്മറി വാങ്ങുന്ന കമ്പനികൾക്ക് വില ഉയർന്നാലും വാങ്ങേണ്ടിവരുന്നു. ഇതോടെ ഉപഭോക്തൃ ഉപകരണങ്ങൾക്കായി ലഭിക്കുന്ന വിതരണത്തിൽ സമ്മർദമുണ്ടാകുകയും വില ഉയരുകയും ചെയ്യുന്നു. എക്കോ ഡോട്ടും എഐ ഡാറ്റാ സെന്ററുകളിലെ ആക്സിലറേറ്ററുകളും ഒരേ ഘടകങ്ങളല്ലെങ്കിലും, അവയ്ക്ക് ആവശ്യമായ വിതരണശൃംഖലയും നിർമാണശേഷിയും പരസ്പരം ബന്ധപ്പെട്ടു കിടക്കുന്നു.

ഇതിന്റെ പ്രത്യാഘാതം മെമ്മറിയിൽ മാത്രം ഒതുങ്ങുന്നില്ല. ഡാറ്റാ സെന്റർ നിർമാണം ശക്തമായതോടെ വൈദ്യുതി വിതരണം, താപനിയന്ത്രണം തുടങ്ങിയ മേഖലകളും ഇപ്പോൾ വിലയേറിയ വിഭവങ്ങളായി മാറുകയാണ്. ഏകദേശം 700 മില്യൺ ഡോളർ വരുമാനം പ്രതീക്ഷിക്കുന്ന ഇലക്ട്രിക്കൽ ഇൻഫ്രാസ്ട്രക്ചർ കമ്പനിയായ മാവറിക് പവറിനെ 1.75 ബില്യൺ ഡോളറിനും പ്രകടനത്തെ അടിസ്ഥാനമാക്കി 550 മില്യൺ ഡോളർ വരെ അധിക തുകയ്ക്കും വാങ്ങാൻ എൻവെന്റ് കരാറിലെത്തി. എഐ ഡാറ്റാ സെന്ററുകൾക്കായുള്ള പവർ മാനേജ്മെന്റിൽ പ്രവർത്തിക്കുന്ന ബെംഗളൂരു ആസ്ഥാനമായ സി2ഐ സെമികണ്ടക്ടേഴ്സിനെ ഇൻഫിനിയോണും ഏറ്റെടുത്തു. എഐ വളർച്ചയുടെ ചെലവ് ഇനി ടെക് കമ്പനികളിൽ മാത്രം ഒതുങ്ങില്ലെന്നും ഫോണുകൾ, ലാപ്ടോപ്പുകൾ, ടെലിവിഷനുകൾ, കാറുകൾ തുടങ്ങിയ ഉപഭോക്തൃ ഉൽപ്പന്നങ്ങളിലേക്കും അതിന്റെ വിലപ്രഭാവം എത്തുമെന്നും ഈ മാറ്റങ്ങൾ സൂചിപ്പിക്കുന്നു.