ഹിന്ദി ‘ദൃശ്യം 3’: അജയ് ദേവ്ഗണിനും അണിയറപ്രവർത്തകർക്കും അഭിനന്ദനം! ഫ്രാഞ്ചൈസിക്ക് ഉചിതമായ അന്ത്യമെന്ന് ചിത്രം കണ്ട ശേഷം മോഹൻലാൽ

മലയാളത്തിൽ തുടങ്ങി ഇന്ത്യയൊട്ടാകെ ആരാധകരെ സ്വന്തമാക്കിയ ‘ദൃശ്യം’ സിനിമാപരമ്പരയുടെ ഹിന്ദി പതിപ്പിനെ പ്രശംസിച്ച് നടൻ മോഹൻലാൽ. ഹിന്ദി ചിത്രം ‘ദൃശ്യം: ദ കൺക്ലൂഷൻ’ കണ്ടശേഷം, ജനപ്രിയമായ ഈ സിനിമായാത്രയ്ക്ക് അനുയോജ്യമായ അവസാനം ഒരുക്കിയ അണിയറപ്രവർത്തകരെ താരം അഭിനന്ദിച്ചു. മോഹൻലാൽ ചിത്രത്തെക്കുറിച്ച് സംസാരിക്കുന്ന വീഡിയോ സിനിമയുടെ നിർമാതാക്കളാണ് സാമൂഹികമാധ്യമങ്ങളിൽ പങ്കുവെച്ചത്.

“ഞാൻ ‘ദൃശ്യം: ദ കൺക്ലൂഷൻ’ കണ്ടു. ജനപ്രിയമായ ഈ യാത്രയ്ക്ക് അനുയോജ്യമായ അവസാനം കണ്ടെത്തിയ രീതിയെ ഞാൻ അഭിനന്ദിക്കുന്നു. അഭിഷേക് പഥക്, കുമാർ മംഗത് പഥക്, അജയ് ദേവ്ഗൺ, ചിത്രത്തിലെ എല്ലാ അഭിനേതാക്കൾക്കും അണിയറപ്രവർത്തകർക്കും എന്റെ അഭിനന്ദനങ്ങൾ. വളരെ നന്നായി ചെയ്തു,” എന്നാണ് മോഹൻലാൽ പറഞ്ഞത്. ചിത്രത്തിന്റെ സംവിധായകനും നിർമാതാക്കളും നായകനുമുൾപ്പെടെയുള്ള അണിയറപ്രവർത്തകർക്കുള്ള താരത്തിന്റെ അഭിനന്ദനം വീഡിയോയിലൂടെ ശ്രദ്ധ നേടുകയാണ്.

അഭിഷേക് പഥക് സംവിധാനം ചെയ്ത ചിത്രത്തിൽ അജയ് ദേവ്ഗണാണ് നായകൻ. ഒക്ടോബർ രണ്ടിന് തിയേറ്ററുകളിലെത്തിയ ചിത്രത്തിന് മികച്ച പ്രേക്ഷക പ്രതികരണമാണ് ലഭിക്കുന്നതെന്നാണ് റിപ്പോർട്ട്. ജയ്ദീപ് അഹ്‌ലാവത്, പ്രകാശ് രാജ്, തബു, ശ്രിയ ശരൺ, രജത് കപൂർ എന്നിവരും പ്രധാന വേഷങ്ങളിലെത്തുന്നു. അഭിഷേക് പഥക്, ആമിൽ കിയാൻ ഖാൻ, പർവേസ് ഷെയ്ഖ് എന്നിവർ ചേർന്നാണ് ചിത്രത്തിന്റെ തിരക്കഥ ഒരുക്കിയത്. അലോക് ജെയിൻ, അജിത് അന്ധാരെ, കുമാർ മംഗത് പഥക്, അഭിഷേക് പഥക് എന്നിവർ ചേർന്നാണ് നിർമാണം.

മലയാളം പതിപ്പിൽനിന്ന് വ്യത്യസ്തമായ വഴിയിലാണ് ഹിന്ദി ഫ്രാഞ്ചൈസിയുടെ കഥ മുന്നോട്ടുപോകുന്നത്. മലയാളത്തിൽ ‘ദൃശ്യം’ പരമ്പരയ്ക്ക് നാലാം ഭാഗമുണ്ടാകാമെന്ന സൂചന നിർമാതാക്കൾ നൽകിയിട്ടുണ്ടെങ്കിലും ഹിന്ദി പതിപ്പ് മൂന്നാം ഭാഗത്തോടെ അവസാനിപ്പിക്കാനാണ് തീരുമാനമെന്ന് നിർമാതാക്കൾ വ്യക്തമാക്കിയിട്ടുണ്ട്. ഇതോടെ ഹിന്ദിയിലെ ‘ദൃശ്യം’ സിനിമാപരമ്പരയ്ക്ക് ‘ദൃശ്യം: ദ കൺക്ലൂഷൻ’ സമാപനമാകുകയാണ്. മോഹൻലാലിന്റെ അഭിനന്ദനം കൂടി എത്തിയതോടെ ചിത്രവും അതിന്റെ അവസാനവും സിനിമാപ്രേമികൾക്കിടയിൽ വീണ്ടും ചർച്ചയാകുന്നു.

Content Highlights: Actor Mohanlal has praised the Hindi version of the ‘Drishyam’ film franchise, which began in Malayalam and garnered fans across India. After watching the Hindi film ‘Drishyam: The Conclusion’, the star commended the filmmakers for crafting a fitting finale to this popular cinematic journey. The film’s producers shared a video on social media featuring Mohanlal speaking about the movie.