ലോക റെക്കോർഡിൽ മുദ്ര പതിപ്പിച്ച് ജിയോ ഐ.പി.ഒ; ഒരു കോടിയിലേറെ അപേക്ഷകൾ നേടി ചരിത്രനേട്ടം

ഇന്ത്യൻ ഓഹരി വിപണിയിൽ പുതിയ ചരിത്രം കുറിച്ച് ജിയോ പ്ലാറ്റ്‌ഫോംസിന്റെ മെഗാ ഐ.പി.ഒ. വിപണി ചരിത്രത്തിൽ ആദ്യമായി ഒരു പബ്ലിക് ഇഷ്യൂവിന് ഒരുകോടിയിലധികം അപേക്ഷകൾ ലഭിക്കുന്നുവെന്ന ആഗോള റെക്കോർഡാണ് ജിയോ സ്വന്തമാക്കിയിരിക്കുന്നത്. ഐപിഒയുടെ മൂന്നാമത്തെയും അവസാനത്തെയും ദിനമായ വെള്ളിയാഴ്ചയാണ് ജിയോയുടെ 30,213 കോടി രൂപയുടെ പബ്ലിക് ഇഷ്യൂ ഈ സുവർണ്ണ നേട്ടം കൈവരിച്ചത്. വെള്ളിയാഴ്ച ഉച്ചയ്ക്ക് 12 മണി വരെ 1,00,15,118 അപേക്ഷകളാണ് ലഭിച്ചത്. ഇതിനുമുമ്പ് വാരി എനർജിസ് ഐ.പി.ഒയുടെ പേരിലുണ്ടായിരുന്ന റെക്കോർഡാണ് ജിയോ ഔദ്യോഗികമായി മറികടന്നത്.

നിക്ഷേപകരുടെ ഭാഗത്തുനിന്ന് എല്ലാ വിഭാഗങ്ങളിലും അഭൂതപൂർവ്വമായ പ്രതികരണമാണ് പ്രകടമായത്. ക്വാളിഫൈഡ് ഇൻസ്റ്റിറ്റിയൂഷണൽ ബയേഴ്‌സ് (ക്യു.ഐ.ബി), നോൺ-ഇൻസ്റ്റിറ്റിയൂഷണൽ ഇൻവെസ്റ്റേഴ്‌സ് (എൻ.ഐ.ഐ), റീട്ടെയിൽ നിക്ഷേപകർ എന്നിവർക്ക് പുറമെ കമ്പനി ജീവനക്കാരും റിലയൻസ് ഓഹരി ഉടമകൾക്കായി മാറ്റിവെച്ച വിഭാഗവും മികച്ച രീതിയിൽ സബ്സ്ക്രൈബ് ചെയ്യപ്പെട്ടു. ഇഷ്യൂവിന്റെ അവസാന മണിക്കൂറുകളിലേക്ക് കടക്കുമ്പോൾ നിക്ഷേപകരിൽ നിന്നുള്ള പങ്കാളിത്തം കൂടുതൽ ശക്തമാകുകയാണ്.

ആദ്യ ദിനം മുതൽ തന്നെ വിപണിയുടെ ശ്രദ്ധ ആകർഷിക്കാൻ ജിയോ ഐ.പി.ഒയ്ക്ക് സാധിച്ചിരുന്നു. വൻകിട നിക്ഷേപകരുടെ പിന്തുണയും പൊതുജനങ്ങളുടെ സജീവ പങ്കാളിത്തവും ഒത്തുവന്നതോടെ ഇന്ത്യൻ കോർപ്പറേറ്റ് ചരിത്രത്തിലെ ഏറ്റവും വലിയ വിജയങ്ങളിലൊന്നായി ഈ പബ്ലിക് ഇഷ്യൂ മാറി. ഡിജിറ്റൽ സേവന രംഗത്തെ കമ്പനിയുടെ ശക്തമായ സ്വാധീനമാണ് ഈ ചരിത്രനേട്ടത്തിന് പിന്നിലെ പ്രധാന കാരണം.

Content Highlights: Jio Platforms’ mega IPO has created a new chapter in the Indian stock market. Jio has set a global record by becoming the first public issuein market history to receive over 10 million (one crore) applications.