2029ലും തോൽക്കും; എസ്.ഐ.ആറിനെ കുറ്റപ്പെടുത്താതെ ആത്മപരിശോധന നടത്തൂ; രാഹുലിനെ പരിഹസിച്ച് അമിത് ഷാ

ന്യൂഡൽഹി: തിരഞ്ഞെടുപ്പ് തോൽവികൾക്ക് വോട്ടർപട്ടികയുടെ പ്രത്യേക തീവ്ര പരിഷ്‌കരണ നടപടിയെ കുറ്റപ്പെടുത്താതെ സ്വന്തം പ്രകടനം വിലയിരുത്തണമെന്ന് കോൺഗ്രസിനോട് കേന്ദ്ര ആഭ്യന്തരമന്ത്രി അമിത് ഷാ. ലോക്‌സഭയിലെ പ്രതിപക്ഷ നേതാവ് രാഹുൽ ഗാന്ധിയെ ലക്ഷ്യമിട്ടായിരുന്നു അദ്ദേഹത്തിന്റെ വിമർശനം. 2029ലെ ലോക്‌സഭാ തിരഞ്ഞെടുപ്പിലും കോൺഗ്രസ് തോൽക്കുമെന്ന പരിഹാസവും അമിത് ഷാ ഉന്നയിച്ചു. എസ്.ഐ.ആറിന്റെ പേരിൽ തെറ്റായ കാര്യങ്ങൾ പ്രചരിപ്പിക്കുകയാണെന്നും നുഴഞ്ഞുകയറ്റക്കാരെ സംരക്ഷിക്കുകയാണെന്നും രാഹുൽ ഗാന്ധിക്കെതിരെ അദ്ദേഹം ആരോപിച്ചു.

ഗുജറാത്തിൽ 41 വർഷമായി കോൺഗ്രസിന് തിരഞ്ഞെടുപ്പ് വിജയം നേടാനായിട്ടില്ലെന്നും 1985ലാണ് പാർട്ടി അവസാനമായി വിജയിച്ചതെന്നും അമിത് ഷാ അവകാശപ്പെട്ടു. അതിനുശേഷം സംസ്ഥാനത്ത് തുടർച്ചയായ തോൽവികളാണ് കോൺഗ്രസ് നേരിടുന്നതെന്നും 2024ലെ ലോക്‌സഭാ തിരഞ്ഞെടുപ്പിനുശേഷമാണ് എസ്.ഐ.ആർ നടപടികൾ ആരംഭിച്ചതെന്നും അദ്ദേഹം ചൂണ്ടിക്കാട്ടി. അതിനാൽ ഗുജറാത്തിലെ തിരഞ്ഞെടുപ്പ് തോൽവികൾക്ക് എസ്.ഐ.ആറിനെ എങ്ങനെ കുറ്റപ്പെടുത്താനാകുമെന്ന് രാഹുൽ ഗാന്ധി ആത്മപരിശോധന നടത്തണമെന്നും അദ്ദേഹം പറഞ്ഞു.

ഗുജറാത്തിലെ നഗരസഭാ, കോർപറേഷൻ തിരഞ്ഞെടുപ്പുകളിലെ ബി.ജെ.പി.യുടെ വിജയവും അമിത് ഷാ ചൂണ്ടിക്കാട്ടി. രണ്ട് മുനിസിപ്പാലിറ്റികളിലും ഒരു കോർപറേഷനിലുമായി ആകെയുള്ള 104 സീറ്റുകളിൽ 90 എണ്ണവും ബി.ജെ.പി. നേടിയെന്നാണ് അദ്ദേഹം പറഞ്ഞത്. ഗാന്ധിനഗർ മുനിസിപ്പൽ കോർപറേഷനിൽ കഴിഞ്ഞ തിരഞ്ഞെടുപ്പിനെ അപേക്ഷിച്ച് ബി.ജെ.പി.യുടെ വോട്ടുവിഹിതം പത്ത് ശതമാനം വർധിച്ചതായും അവകാശപ്പെട്ടു. സംസ്ഥാനത്തെ ജനങ്ങളുടെ രാഷ്ട്രീയ നിലപാടും പ്രധാനമന്ത്രി നരേന്ദ്ര മോദിയോടുള്ള പിന്തുണയുമാണ് ഫലങ്ങൾ വ്യക്തമാക്കുന്നതെന്നും അദ്ദേഹം പറഞ്ഞു.

പശ്ചിമ ബംഗാൾ, തമിഴ്‌നാട്, പുതുച്ചേരി എന്നിവിടങ്ങളിലെ ഉപതിരഞ്ഞെടുപ്പുകളിലെ കോൺഗ്രസിന്റെ പ്രകടനത്തെയും അമിത് ഷാ വിമർശിച്ചു. രാഹുൽ ഗാന്ധി ലോക്‌സഭയിലെ പ്രതിപക്ഷ നേതാവായതിനുശേഷം കോൺഗ്രസ് തുടർച്ചയായി തിരഞ്ഞെടുപ്പുകളിൽ പരാജയപ്പെടുകയാണെന്നും തോൽവിയുടെ കാരണങ്ങൾ പാർട്ടി പരിശോധിക്കണമെന്നും അദ്ദേഹം ആവശ്യപ്പെട്ടു. പ്രധാനമന്ത്രിക്കുള്ള ജനപിന്തുണ അംഗീകരിക്കാൻ രാഹുൽ ഗാന്ധിക്ക് കഴിയുന്നില്ലെന്നും എസ്.ഐ.ആറിനെ കുറ്റപ്പെടുത്തുന്നതിനു പകരം തിരഞ്ഞെടുപ്പ് പ്രകടനം വിലയിരുത്തുകയാണ് വേണ്ടതെന്നും അമിത് ഷാ ആവർത്തിച്ചു. കോൺഗ്രസിന്റെ തിരഞ്ഞെടുപ്പ് തന്ത്രങ്ങളും എസ്.ഐ.ആറിനെതിരായ പ്രതിഷേധവും വീണ്ടും രാഷ്ട്രീയ ചർച്ചകളിൽ ശ്രദ്ധാകേന്ദ്രമാകുകയാണ്.

Content Highlights: Union Home Minister Amit Shah urged the Congress to evaluate its own performance rather than blaming the special intensive revision of the electoral rolls for its election defeats. His criticism was directed at the Leader of the Opposition in the Lok Sabha, Rahul Gandhi. Shah also mocked the party, predicting that the Congress would lose the 2029 Lok Sabha elections as well.