ഇന്ത്യൻ ക്രിക്കറ്റ് ഇതിഹാസം വിരാട് കോഹ്ലിയുടെ പ്രതിച്ഛായ തകർക്കാൻ ചില മാധ്യമപ്രവർത്തകർ തനിക്ക് വൻതുക വാഗ്ദാനം ചെയ്തുവെന്ന വെളിപ്പെടുത്തലുമായി ജർമ്മൻ മോഡൽ ലിസ് ലാസ്. തന്റെ ഇൻസ്റ്റഗ്രാം പോസ്റ്റിന് കോഹ്ലി ലൈക്ക് ചെയ്തതിനെത്തുടർന്നുണ്ടായ വിവാദങ്ങൾക്ക് പിന്നാലെയാണ് ലിസ് ലാസ് രംഗത്തെത്തിയത്.
ലിസ് ലാസ് ഇൻസ്റ്റഗ്രാമിൽ പങ്കുവെച്ച ഒരു ചിത്രത്തിന് കോഹ്ലി ലൈക്ക് ചെയ്തത് വലിയ ചർച്ചയായിരുന്നു. പിന്നീട് താരം ആ ലൈക്ക് പിൻവലിച്ചതും വാർത്തകളിൽ ഇടംപിടിച്ചു. എന്നാൽ ഈ സംഭവത്തെ ചുറ്റിപ്പറ്റി കോഹ്ലിക്കെതിരെ വ്യാജ വാർത്തകൾ ചമയ്ക്കാനാണ് ചിലർ ശ്രമിച്ചതെന്ന് ലിസ് പറയുന്നു.
“കോഹ്ലിയെക്കുറിച്ച് മോശമായ കാര്യങ്ങൾ പറയാൻ ചില മാധ്യമപ്രവർത്തകർ എന്നെ സമീപിച്ചു. അദ്ദേഹം ചെയ്യാത്ത കാര്യങ്ങൾ ആരോപിക്കാനായിരുന്നു അവരുടെ ആവശ്യം. ഇതിനായി വലിയൊരു തുക അവർ വാഗ്ദാനം ചെയ്തു,” ലിസ് വ്യക്തമാക്കി. എന്നാൽ പണത്തിനോ പ്രശസ്തിക്കോ വേണ്ടി കോഹ്ലിയെപ്പോലൊരു താരത്തിന്റെ പ്രതിച്ഛായ നശിപ്പിക്കാൻ താൻ ആഗ്രഹിക്കുന്നില്ലെന്നും താരം കൂട്ടിച്ചേർത്തു.
വിരാട് കോഹ്ലിയെ താൻ വളരെയധികം ആരാധിക്കുന്നുണ്ടെന്നും തന്റെ പോസ്റ്റ് അദ്ദേഹം ലൈക്ക് ചെയ്തതിൽ വലിയ സന്തോഷമുണ്ടെന്നും ലിസ് പറഞ്ഞു. ചിലർ താൻ പറയാൻ ആഗ്രഹിക്കാത്ത കാര്യങ്ങൾ പറയിക്കാൻ നിർബന്ധിച്ചെങ്കിലും എല്ലാ ഓഫറുകളും താൻ നിരസിച്ചു. പണത്തിന് വേണ്ടി എന്തിന് തെറ്റായ കാര്യങ്ങൾ പ്രചരിപ്പിക്കണമെന്നും ലിസ് ചോദിക്കുന്നു. വിദേശ മോഡലിന്റെ ഈ വെളിപ്പെടുത്തൽ ഇപ്പോൾ കായിക ലോകത്ത് വലിയ ചർച്ചയായിരിക്കുകയാണ്.