ഗോമാതാവിനെ സംരക്ഷിക്കും, സന്യാസികളെ അപമാനിച്ചാൽ ജയിലിൽ അടയ്ക്കും: സുവേന്ദു അധികാരി

കൊൽക്കൊത്ത: പശ്ചിമ ബംഗാളിൽ പശുക്കൾക്ക് സംരക്ഷണം ഉറപ്പാക്കുമെന്നും സന്യാസികളെ അപമാനിക്കുന്നവരെ ജയിലിലടയ്ക്കുമെന്നും മുഖ്യമന്ത്രി സുവേന്ദു അധികാരി. കൊൽക്കത്തയിലെ നേതാജി ഇൻഡോർ സ്റ്റേഡിയത്തിൽ നടന്ന ഭഗവത് ഗീത പാരായണ പരിപാടിയിൽ സംസാരിക്കവെയാണ് അദ്ദേഹം ഇക്കാര്യം പറഞ്ഞത്. വിശ്വാസങ്ങളെ പിന്തുടരുമ്പോഴോ പ്രചരിപ്പിക്കുമ്പോഴോ ആരും ഭയപ്പെടേണ്ടതില്ലെന്നും, സംസ്ഥാനത്ത് രാഷ്ട്രീയ സാഹചര്യങ്ങൾ മാറിയിട്ടുണ്ടെന്നും അദ്ദേഹം കൂട്ടിച്ചേർത്തു.

പരിപാടിയിൽ സംസാരിക്കവെ യാതൊരു മടിയും കൂടാതെ ഭഗവദ്ഗീത പാരായണം ചെയ്യാനും പ്രചരിപ്പിക്കാനും, ഹനുമാൻ ചാലിസ വിതരണം ചെയ്യാനും, ഹരേ കൃഷ്ണ മന്ത്രം ജപിക്കാനും ശംഖ് മുഴക്കാനും സുവേന്ദു അധികാരി ആഹ്വാനം ചെയ്തു. ഗോമാതാവിനെ സംരക്ഷിക്കുന്ന സർക്കാരാണ് പശ്ചിമ ബംഗാളിലുള്ളതെന്നും സന്യാസിമാരെ അപമാനിക്കുന്നവരെ സർക്കാർ വെറുതെ വിടില്ലെന്നും അദ്ദേഹം മുന്നറിയിപ്പ് നൽകി. പുരോഹിതർക്കും മതനേതാക്കൾക്കും തങ്ങളുടെ വിശ്വാസങ്ങൾ പ്രസംഗിക്കാനുള്ള പൂർണ്ണ സ്വാതന്ത്ര്യം ഉണ്ടായിരിക്കണമെന്നും അദ്ദേഹം ചൂണ്ടിക്കാട്ടി. ബാഗേശ്വർ ബാബയുടെ ബംഗാൾ സന്ദർശനവേളയിൽ അദ്ദേഹത്തിന്റെ ചിത്രവും കോലവും കത്തിച്ചവർക്കെതിരെ തന്റെ സർക്കാർ കർശന നടപടിയെടുത്ത കാര്യവും മുഖ്യമന്ത്രി എടുത്തുപറഞ്ഞു.

സന്യാസിമാരെയും പുരോഹിതരെയും അപമാനിക്കുന്നവരെ ജയിലിലടയ്ക്കുമെന്ന് താൻ മുൻപും വ്യക്തമാക്കിയിട്ടുള്ളതാണെന്ന് അദ്ദേഹം ഓർമ്മിപ്പിച്ചു. കശ്മീരിന് സ്വാതന്ത്ര്യം ആവശ്യപ്പെടുന്ന ‘തുക്കഡെ തുക്കഡെ ഗ്യാങ്ങി’നെതിരെ ജനങ്ങൾ ഒറ്റക്കെട്ടായി ജാഗ്രത പാലിക്കണമെന്നും സുവേന്ദു അധികാരി ആവശ്യപ്പെട്ടു. മുൻ മുഖ്യമന്ത്രി മമത ബാനർജി അടുത്തിടെ നടത്തിയ ‘ആസാദി’ പരാമർശത്തെയും അദ്ദേഹം രൂക്ഷമായി വിമർശിച്ചു. ഇന്ത്യയ്ക്ക് 1947-ൽ തന്നെ സ്വാതന്ത്ര്യം ലഭിച്ചതാണെന്നും, ഇത്തരം പ്രസ്താവനകൾ ആവർത്തിച്ചാൽ രാജ്യസ്നേഹികൾ അവരെ പാഠം പഠിപ്പിക്കുമെന്നും അദ്ദേഹം കൂട്ടിച്ചേർത്തു.