എസ്‌ഐആർ വിവാദത്തിൽ നിലപാട് വ്യക്തമാക്കി തിരഞ്ഞെടുപ്പ് കമ്മീഷൻ, പ്രധാന തീരുമാനങ്ങളെല്ലാം ഏകകണ്ഠമായിരുന്നെന്ന് വിശദീകരണം

ന്യൂഡൽഹി: പ്രത്യേക തീവ്ര വോട്ടർപട്ടിക പുതുക്കൽ നടപടിയായ എസ്‌ഐആറിനെച്ചൊല്ലി തിരഞ്ഞെടുപ്പ് കമ്മീഷനിലെ അംഗങ്ങൾക്കിടയിൽ അഭിപ്രായവ്യത്യാസമുണ്ടെന്ന റിപ്പോർട്ടുകൾക്കിടെ നിലപാട് വ്യക്തമാക്കി കമ്മീഷൻ. മുഖ്യ തിരഞ്ഞെടുപ്പ് കമ്മീഷണർ ജ്ഞാനേഷ് കുമാറിന്റെ നേതൃത്വത്തിൽ തിരഞ്ഞെടുപ്പ് കമ്മീഷണർമാരായ സുഖ്ബീർ സിങ് സന്ധുവും വിവേക് ജോഷിയും ശനിയാഴ്ച ന്യൂഡൽഹിയിലെ തിരഞ്ഞെടുപ്പ് കമ്മീഷൻ ആസ്ഥാനത്ത് യോഗം ചേർന്നു. തുടർന്ന് പുറത്തിറക്കിയ വിശദമായ കുറിപ്പിൽ, എസ്‌ഐആറുമായി ബന്ധപ്പെട്ട പ്രധാന തീരുമാനങ്ങൾ കമ്മീഷന്റെ ഏകകണ്ഠമായ അംഗീകാരത്തോടെയാണ് എടുത്തതെന്ന് വ്യക്തമാക്കി.

2025 ജൂൺ 24ന് എല്ലാ സംസ്ഥാനങ്ങളെയും കേന്ദ്രഭരണ പ്രദേശങ്ങളെയും ഉൾപ്പെടുത്തി പുറപ്പെടുവിച്ച എസ്‌ഐആർ ഉത്തരവിന് കമ്മീഷന്റെ ഏകകണ്ഠമായ അംഗീകാരമുണ്ടായിരുന്നുവെന്നാണ് വിശദീകരണം. 2025 ഒക്ടോബർ 27ന് 12 സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കുമായി പുറപ്പെടുവിച്ച സമയക്രമവും 2026 മേയ് 14ന് മറ്റൊരു 19 സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കുമായി പുറപ്പെടുവിച്ച സമയക്രമവും ഏകകണ്ഠമായാണ് അംഗീകരിച്ചതെന്നും കമ്മീഷൻ പറഞ്ഞു. അതേസമയം, രണ്ട് തിരഞ്ഞെടുപ്പ് കമ്മീഷണർമാർ പല തീരുമാനങ്ങളിലും രേഖാമൂലം എതിർപ്പുകൾ ഉന്നയിച്ചെന്നായിരുന്നു ഇന്ത്യൻ എക്സ്പ്രസ് റിപ്പോർട്ട്.

കാബിനറ്റ് സെക്രട്ടറിക്ക് അയച്ച കത്തിനെക്കുറിച്ചും കമ്മീഷൻ വിശദീകരണം നൽകി. അത് കമ്മീഷന്റെ നയപരമായ തീരുമാനവുമായോ വിവരസാങ്കേതിക വിഭാഗവുമായി ബന്ധപ്പെട്ട നയവുമായോ ബന്ധപ്പെട്ടതല്ലെന്നും, കമ്മീഷനിൽ ഡെപ്യൂട്ടേഷനിൽ പ്രവർത്തിക്കുന്ന ഒരു ഉദ്യോഗസ്ഥന്റെ ജോലിയുമായി ബന്ധപ്പെട്ടതാണെന്നും വ്യക്തമാക്കി. എസ്‌ഐആർ നടപടിയിൽ രേഖകളിൽ പ്രശ്നമുള്ളതോ പട്ടികയിൽ ബന്ധിപ്പിക്കാനാകാത്തതോ ആയി കണ്ടെത്തുന്ന വോട്ടർമാരുടെ വീടുകളിൽ ബൂത്ത് ലെവൽ ഓഫീസർമാർ നേരിട്ട് എത്തി രേഖകൾ ശേഖരിച്ച് ഇസിനറ്റിൽ അപ്‌ലോഡ് ചെയ്യും. ഇത്തരം വോട്ടർമാരെ സാധാരണയായി തിരഞ്ഞെടുപ്പ് രജിസ്ട്രേഷൻ ഓഫീസറുടെയോ അസിസ്റ്റന്റ് തിരഞ്ഞെടുപ്പ് രജിസ്ട്രേഷൻ ഓഫീസറുടെയോ ഓഫീസിലേക്ക് വിളിക്കേണ്ടതില്ലെന്നും, പ്രത്യേക സാഹചര്യങ്ങളിൽ മാത്രം വാദം കേൾക്കൽ നടത്തുമെന്നും അതും സാധ്യമെങ്കിൽ ഓൺലൈനായി നടത്തുമെന്നും കമ്മീഷൻ അറിയിച്ചു. കുടുംബത്തിലെ പ്രായപൂർത്തിയായ ഒരാൾക്ക് വോട്ടർക്കുവേണ്ടിയും ഹാജരാകാം.

ഇതിനൊപ്പം തൊഴിലാളികൾ, ഭവനരഹിതർ, ദരിദ്രർ, രാത്രി അഭയകേന്ദ്രങ്ങളിൽ കഴിയുന്നവർ എന്നിവർക്കായി സഹായകേന്ദ്രങ്ങളും പ്രത്യേക ക്യാമ്പുകളും സംഘടിപ്പിക്കാൻ നിർദേശം നൽകി. ഇസിനറ്റിന്റെ പ്രവർത്തനം തിരഞ്ഞെടുപ്പ് നിയമങ്ങളുമായി പൊരുത്തപ്പെടുന്നുണ്ടോ എന്ന് പരിശോധിക്കാൻ മുതിർന്ന ഡെപ്യൂട്ടി തിരഞ്ഞെടുപ്പ് കമ്മീഷണറുടെ നേതൃത്വത്തിൽ സ്വതന്ത്ര ഐഐടി അല്ലെങ്കിൽ ഐഐഐടി വിദഗ്ധൻ ഉൾപ്പെടുന്ന സമിതിയെയും നിയോഗിച്ചു. ഡൽഹിയിൽ എസ്‌ഐആർ അവകാശവാദങ്ങളും എതിർപ്പുകളും സമർപ്പിക്കാനുള്ള അവസാന തീയതി ഒക്ടോബർ 30 വരെയും മഹാരാഷ്ട്രയിൽ ഒക്ടോബർ 12 വരെയും നീട്ടി. ബിഹാർ, പശ്ചിമ ബംഗാൾ ഉൾപ്പെടെ 20 സംസ്ഥാനങ്ങളിലും കേന്ദ്രഭരണ പ്രദേശങ്ങളിലും എസ്‌ഐആർ പൂർത്തിയായെന്നും ശേഷിക്കുന്ന മൂന്നാം ഘട്ട സംസ്ഥാനങ്ങളിലെ നടപടികൾ പൂർത്തിയായ ശേഷം അന്തിമ വോട്ടർ കണക്ക് വ്യക്തമാകുമെന്നും കമ്മീഷൻ അറിയിച്ചു.

Content Highlights:
The Election Commission has clarified its stance amidst reports of differences of opinion among its members regarding the Special Intensive Revision (SIR) of the electoral rolls. Chief Election Commissioner Gyanesh Kumar, along with Election Commissioners Sukhbir Singh Sandhu and Vivek Joshi, held a meeting on Saturday at the Commission’s headquarters in New Delhi.