ആൺകുട്ടികൾ കരയാൻ പാടില്ലെന്ന് ആരാ പറഞ്ഞത്? കരയാൻ തോന്നിയാൽ കരയണം: കരീന കപൂർ

കുട്ടികളെ വളർത്തുന്നതിൽ ഇന്നത്തെ മാതാപിതാക്കൾ നേരിടുന്ന വെല്ലുവിളികൾ വളരെ വലുതാണ്. പഴയ തലമുറയിൽ മാതാപിതാക്കളോടുള്ള ഭയവും അച്ചടക്കവും മുന്നിൽ നിന്നപ്പോൾ, ഇന്നത്തെ ഓട്ടപ്പാച്ചിലിനിടയിൽ മക്കളോടൊപ്പം സമയം ചെലവഴിക്കാനോ അവരുടെ മാനസികവികാരങ്ങൾ കേൾക്കാനോ പലർക്കും സാധിക്കാറില്ല. എന്നാൽ തിരക്കുപിടിച്ച അഭിനയ ജീവിതത്തിനിടയിലും മക്കളുടെ വൈകാരികമായ വളർച്ചയ്ക്ക് ഏറെ പ്രാധാന്യം നൽകുകയാണ് ബോളിവുഡ് താരം കരീന കപൂർ.

തന്റെ പുതിയ ചിത്രമായ ‘ദായ്റ’യുടെ ട്രെയിലർ ലോഞ്ച് ചടങ്ങിലാണ് കരീന സ്വന്തം പേരന്റിങ് ശൈലിയെക്കുറിച്ച് മനസ്സുതുറന്നത്. മക്കളായ തൈമൂറിനെയും ജെയെയും വളർത്തുമ്പോൾ അവരുടെ വികാരങ്ങൾ സ്വതന്ത്രമായി പ്രകടിപ്പിക്കാനുള്ള സ്വാതന്ത്ര്യം താൻ നൽകുന്നുണ്ടെന്ന് താരം വ്യക്തമാക്കി. ആൺകുട്ടികൾ വികാരങ്ങൾ ഉള്ളിലൊതുക്കണമെന്ന പൊതുബോധത്തെ തിരുത്തുകയാണ് കരീന.

“താൻ രണ്ട് ആൺകുട്ടികളുടെ അമ്മയാണ്. ഒരു അമ്മയെന്ന നിലയിൽ അവരെ സംരക്ഷിക്കുന്നതിനൊപ്പം ഉത്തരവാദിത്തമുള്ളവരും ദയയുള്ളവരുമായി വളർത്തുക എന്നതാണ് പ്രധാനം. പുരുഷന്മാരും ആൺകുട്ടികളും കൂടുതൽ ദയയുള്ളവരായിരിക്കണം. ഒരു പെൺകുട്ടിയുടെയോ അമ്മയുടെയോ മുന്നിൽ വെച്ച് തങ്ങളുടെ വികാരങ്ങൾ പ്രകടിപ്പിക്കാനോ കരയാനോ മടിക്കാത്ത ആൺകുട്ടികൾ ഇന്നത്തെക്കാലത്തുണ്ട്. കരയണം എന്ന് തോന്നിയാൽ ഉറപ്പായും കരയണം എന്ന് തന്നെയാണ് ഞാൻ എന്റെ മകനോട് പറയാറുള്ളത്,” കരീന കൂട്ടിച്ചേർത്തു.

സ്ത്രീകൾ മാത്രമാണ് കൂടുതൽ വൈകാരികമായി ചിന്തിക്കുന്നത് എന്ന ധാരണ തെറ്റാണെന്നും ആൺകുട്ടികൾക്കും അവരുടെ സങ്കടങ്ങൾ തുറന്നു പ്രകടിപ്പിക്കാനുള്ള അവകാശമുണ്ടെന്നും കരീന ഓർമ്മിപ്പിക്കുന്നു. 2012-ൽ വിവാഹിതരായ കരീന കപൂറിനും സെയ്ഫ് അലി ഖാനും തൈമൂർ, ജഹാംഗീർ (ജെ) എന്നിങ്ങനെ രണ്ട് ആൺമക്കളാണുള്ളത്.

Content Highlights:
Parents today face immense challenges in raising their children. While the previous generation prioritized discipline and a sense of reverence—or even fear—towards parents, the hectic pace of modern life often leaves people unable to spend quality time with their children or listen to their emotional needs. Yet, amidst a busy acting career, Bollywood star Kareena Kapoor places great importance on her children’s emotional growth.