മാധ്യമങ്ങളുടേത് വ്യാജ പ്രചാരണങ്ങൾ “20-ാം വയസ്സ് മുതൽ കൃത്യമായി നികുതി അടയ്ക്കുന്നു”

ബോളിവുഡ് നടി രാകുൽ പ്രീത് സിംഗിന്റെ പേരിൽ പ്രചരിച്ച വ്യാജ വാർത്തകൾക്കും ആദായനികുതി റെയ്ഡ് ആരോപണങ്ങൾക്കുമെതിരെ താരം രംഗത്ത്. തനിക്കെതിരെ ചില മാധ്യമങ്ങളിൽ വന്ന റിപ്പോർട്ടുകൾ തികച്ചും അടിസ്ഥാനരഹിതമാണെന്നും നിയമവിരുദ്ധ പ്രവർത്തനങ്ങളിൽ യാതൊരു പങ്കുമില്ലെന്നും ഇൻസ്റ്റാഗ്രാമിലൂടെ നടി വ്യക്തമാക്കി.

വാഷു ഭഗ്നാനി, പനോരമ സ്റ്റുഡിയോ എന്നിവരുമായി ബന്ധപ്പെട്ട് കഴിഞ്ഞ മാസം നടന്ന ആദായനികുതി വകുപ്പ് റെയ്ഡുമായി ബന്ധപ്പെടുത്തി തന്റെ പേരും മാധ്യമങ്ങൾ വലിച്ചിഴയ്ക്കുകയായിരുന്നു. വസ്തുതകൾ പരിശോധിക്കാതെ വാർത്തകൾ സെൻസേഷണലൈസ് ചെയ്യുന്ന പ്രവണത വളരുന്നത് വേദനാജനകമാണെന്നും രാകുൽ കുറിപ്പിൽ വ്യക്തമാക്കി.

താൻ കഠിനാധ്വാനത്തിലൂടെ കടന്നുവന്ന വ്യക്തിയാണെന്നും, ഉത്തരവാദിത്തമുള്ള പൗരയെന്ന നിലയിൽ ഇരുപതാം വയസ്സു മുതൽ കൃത്യമായി നികുതി അടയ്ക്കുന്നുണ്ടെന്നും താരം ഓർമ്മിപ്പിച്ചു. രാജ്യത്തോ വിദേശത്തോ യാതൊരുവിധ ബിനാമി സ്വത്തുകളോ നിയമവിരുദ്ധ വിദേശ പണമിടപാടുകളോ തനിക്കില്ലെന്നും, വിലയേറിയ സമ്മാനങ്ങൾ താൻ സ്വീകരിക്കാറില്ലെന്നും രാകുൽ വ്യക്തമാക്കി.

തെറ്റായ വിവരങ്ങൾ പ്രസിദ്ധീകരിച്ച മാധ്യമ സ്ഥാപനങ്ങൾ പ്രസ്തുത ലേഖനങ്ങൾ പിൻവലിച്ച് വസ്തുതകൾ വ്യക്തമാക്കണമെന്ന് നടി ആവശ്യപ്പെട്ടു. വാണിജ്യ സമ്മർദ്ദങ്ങളുടെ പേരിൽ ഒരാളുടെ പ്രശസ്തിയും ഉപജീവനവും തകർക്കുന്ന രീതിയിലുള്ള വാർത്തകൾ നൽകരുതെന്നും അവർ അഭ്യർത്ഥിച്ചു. നിതേഷ് തിവാരിയുടെ വരാനിരിക്കുന്ന ‘രാമായണം’ ചിത്രത്തിൽ ശൂർപ്പണഖയായി അഭിനയിക്കുന്നതിന്റെ തിരക്കുകളിലാണ് നടി ഇപ്പോൾ.

Content Highlights: Bollywood actress Rakul Preet Singh has spoken out against fake news and allegations regarding Income Tax raids circulating about her. Through Instagram, the actress clarified that the reports appearing in certain media outlets are completely baseless and that she is not involved in any illegal activities.