കേരളത്തെ ഏവിയേഷൻ-തുറമുഖ ഹബ്ബാക്കും; വൻകിട നിക്ഷേപങ്ങൾ അനിവാര്യമെന്ന് മുഖ്യമന്ത്രി വിഡി സതീശൻ

തിരുവനന്തപുരം: കേരളത്തിന്റെ ഭാവി വികസനത്തിനും സമ്പദ്‌വ്യവസ്ഥയുടെ വളർച്ചയ്ക്കുമായി വൻകിട നിക്ഷേപങ്ങൾ അനിവാര്യമാണെന്ന് മുഖ്യമന്ത്രി വിഡി സതീശൻ. പരമ്പരാഗത ‘കേരള മോഡൽ’ വികസനം ചില വെല്ലുവിളികൾ നേരിടുന്നുണ്ടെന്നും, കാലാനുസൃതമായ മാറ്റങ്ങളിലൂടെ സംസ്ഥാനത്തെ കൂടുതൽ മുന്നോട്ട് നയിക്കേണ്ടതുണ്ടെന്നും അദ്ദേഹം അഭിപ്രായപ്പെട്ടു.

കേരളത്തെ എല്ലാ മേഖലകളിലും ഒന്നാമതെത്തിക്കുകയാണ് സർക്കാരിന്റെ ലക്ഷ്യം. എന്നാൽ ഉയർന്ന ജനസാന്ദ്രതയും ഭൂമിയുടെ ലഭ്യതക്കുറവും വികസനത്തിന് വലിയ വെല്ലുവിളിയാണ്. ഈ പരിമിതികൾക്കുള്ളിൽ നിന്നുകൊണ്ട് തന്നെ പുതിയ സാധ്യതകൾ കണ്ടെത്തേണ്ടതുണ്ട്. നിലവിൽ നിരവധി വ്യവസായികളും നിക്ഷേപകരും കേരളത്തിൽ നിക്ഷേപം നടത്താൻ താല്പര്യം പ്രകടിപ്പിച്ചു മുന്നോട്ടുവരുന്നുണ്ട്.

കേരളത്തിന്റെ സവിശേഷമായ ഭൂമിശാസ്ത്രപരമായ പ്രത്യേകതകൾ പ്രയോജനപ്പെടുത്തി സംസ്ഥാനത്തെ ഒരു പ്രധാന തുറമുഖ നഗരമാക്കി മാറ്റും. അതോടൊപ്പം, വ്യോമയാന മേഖലയിലെ സാധ്യതകൾ ഉപയോഗപ്പെടുത്തി കേരളത്തെ പ്രമുഖ ഏവിയേഷൻ ഹബ്ബാക്കി മാറ്റാനാണ് സർക്കാർ ലക്ഷ്യമിടുന്നത്. പുതിയ നിക്ഷേപങ്ങളിലൂടെ മാത്രമേ ഖജനാവിലേക്ക് വരുമാനം എത്തുകയും സംസ്ഥാനത്തിന്റെ സാമ്പത്തിക ഭദ്രത ഉറപ്പാക്കാൻ സാധിക്കുകയുമുള്ളൂ. അതിനാൽ അനുകൂലമായ നിക്ഷേപ അന്തരീക്ഷം ശക്തിപ്പെടുത്തേണ്ടത് അത്യാവശ്യമാണ്.

ലോകമെമ്പാടും പ്രശസ്തമായ കേരളത്തിന്റെ മാനവ വിഭവശേഷിയെയും കഴിവുള്ള യുവാക്കളെയും സംസ്ഥാനത്തിന്റെ വളർച്ചയ്ക്കായി കൃത്യമായി ഉപയോഗപ്പെടുത്തണം. എല്ലാ മേഖലകളിലും വലിയൊരു മുന്നേറ്റമാണ് ആവശ്യമായിട്ടുള്ളത്. ഈ ലക്ഷ്യം കൈവരിക്കുന്നതിനും നാടിന്റെ സമഗ്ര വികസനത്തിനുമായി രാഷ്ട്രീയം മറന്ന് എല്ലാവരും ഒന്നിച്ചുനിൽക്കണമെന്നും മുഖ്യമന്ത്രി ആഹ്വാനം ചെയ്തു.

Content Highlights:V.D. Satheesan stated that large-scale investments are essential for Kerala’s future development and the growth of its economy. He observed that the traditional ‘Kerala Model’ of development is facing certain challenges, and that the state needs to be steered further forward through timely, contemporary changes.