ചലച്ചിത്ര രംഗത്തെ പുരുഷാധിപത്യ പ്രവണതകളെയും തൊഴിലിടങ്ങളിലെ അസമത്വങ്ങളെയും കുറിച്ച് തുറന്നു പറഞ്ഞ് പ്രമുഖ നടി രാധിക ആപ്തെ

ഇന്ത്യൻ ചലച്ചിത്ര രംഗത്തെ പുരുഷാധിപത്യ പ്രവണതകളെയും തൊഴിലിടങ്ങളിലെ അസമത്വങ്ങളെയും വീണ്ടും ചർച്ചകളിലേക്ക് എത്തിച്ച് പ്രമുഖ നടി രാധിക ആപ്തെയുടെ വെളിപ്പെടുത്തൽ. കീർത്തി സുരേഷിനൊപ്പം അഭിനയിച്ച ‘അക്ക’ എന്ന സീരീസിന്റെ പ്രമോഷൻ അഭിമുഖത്തിനിടെയാണ്, കരിയറിന്റെ തുടക്കത്തിൽ തെലുങ്ക് സിനിമയിൽ പ്രവർത്തിച്ചപ്പോഴുള്ള ദുഷ്കരമായ അനുഭവങ്ങളെക്കുറിച്ച് താരം തുറന്നുപറഞ്ഞത്.

സ്വന്തം മാമനെ വിവാഹം കഴിക്കേണ്ടിവരുന്ന കഥാപാത്രത്തെ അവതരിപ്പിച്ചതും, തന്നേക്കാൾ ഏറെ പ്രായമുള്ള മുതിർന്ന നടനൊപ്പം പ്രണയരംഗങ്ങളിൽ അഭിനയിക്കേണ്ടിവന്നതും കടുത്ത മാനസിക അസ്വസ്ഥത ഉണ്ടാക്കിയെന്ന് രാധിക വ്യക്തമാക്കി. നന്ദമൂരി ബാലകൃഷ്ണ നായകനായി 2014-ൽ റിലീസ് ചെയ്ത ‘ലെജൻഡ്’ എന്ന ചിത്രത്തെക്കുറിച്ചായിരുന്നു നടിയുടെ പ്രതികരണം. സിനിമയുടെ പകുതിയിൽ കഥാപാത്രം മരിക്കുമെങ്കിലും, മൃതദേഹവുമായി നായകൻ നടത്തുന്ന ആക്ഷൻ രംഗങ്ങളുടെ ചിത്രീകരണത്തിനിടെ താൻ ശരിക്കും ഭയന്നുപോയെന്നും താരം കൂട്ടിച്ചേർത്തു. കടുത്ത പുരുഷാധിപത്യപരമായ അന്തരീക്ഷമാണ് ആ സെറ്റിൽ ഉണ്ടായിരുന്നതെന്നും അവർ ഓർത്തെടുത്തു.

അതേസമയം, രാധികയുടെ പ്രസ്താവനയ്‌ക്കെതിരെ ഒരു വിഭാഗം വിമർശനവുമായി രംഗത്തെത്തിയിട്ടുണ്ട്. കഥയോ പ്രായക്കൂടുതലുള്ള നായകനൊപ്പമുള്ള അഭിനയമോ പ്രശ്നമായിരുന്നെങ്കിൽ സിനിമയ്ക്ക് മുൻപേ അത് നിരസിക്കാമായിരുന്നില്ലേ എന്നും, വർഷങ്ങൾക്ക് ശേഷം ഇത്തരം ആരോപണങ്ങൾ ഉന്നയിക്കുന്നത് എന്തിനാണെന്നുമാണ് വിമർശകരുടെ ചോദ്യം. എന്നാൽ, കരിയറിന്റെ തുടക്കത്തിൽ പൂർണ്ണമായ തിരക്കഥ ലഭിക്കാറില്ലെന്നതും മുൻനിര താരങ്ങളെയും വൻകിട പ്രൊഡക്ഷൻ ഹൗസുകളെയും എതിർത്താൽ അവസരങ്ങൾ നഷ്ടപ്പെടുമെന്ന ഭയവും പുതുമുഖങ്ങൾ നേരിടുന്ന യാഥാർത്ഥ്യമാണെന്ന് സിനിമാ നിരീക്ഷകർ ചൂണ്ടിക്കാണിക്കുന്നു.

Content Highlights: Prominent actress Radhika Apte has brought discussions regarding patriarchal tendencies and workplace inequalities in the Indian film industry back to the forefront with her recent revelations. During a promotional interview for the series ‘Akka’—in which she stars alongside Keerthy Suresh—the actress opened up about the difficult experiences she faced while working in the Telugu film industry early in her career.