തിരഞ്ഞെടുപ്പ് കമ്മീഷനെതിരായ ‘വോട്ട് ചോരി’ ആരോപണങ്ങൾക്ക് എതിരെ തുറന്ന കത്തുമായി 42 മുൻ ജഡ്ജിമാർ

ന്യൂഡൽഹി: തെരഞ്ഞെടുപ്പ് കമ്മീഷനെ ചുറ്റിപ്പറ്റിയുള്ള രാഷ്ട്രീയ വിവാദവും വോട്ടർപട്ടികയിലെ പ്രത്യേക തീവ്ര പരിഷ്‌കരണവും (എസ്‌ഐആർ) സംബന്ധിച്ച പ്രതിഷേധങ്ങളും ശക്തമാകുന്നതിനിടെ നിർണായക ഇടപെടലുമായി 42 മുൻ ജഡ്ജിമാർ. തെരഞ്ഞെടുപ്പ് കമ്മീഷൻ ഉൾപ്പെടെയുള്ള ഭരണഘടനാ സ്ഥാപനങ്ങളെ തകർക്കാനുള്ള ശ്രമങ്ങൾ ജനാധിപത്യ സംവിധാനത്തിലുള്ള വിശ്വാസത്തെ ദുർബലപ്പെടുത്തുമെന്ന് ചൂണ്ടിക്കാട്ടിയാണ് മുൻ ജഡ്ജിമാർ തുറന്ന കത്ത് പുറത്തിറക്കിയത്. ആരോപണങ്ങൾ ഉന്നയിക്കുന്നത് ജനാധിപത്യ അവകാശമാണെങ്കിലും തെളിവില്ലാത്ത ആരോപണങ്ങളിലൂടെ സ്ഥാപനങ്ങളുടെ വിശ്വാസ്യത തകർക്കുന്നത് അംഗീകരിക്കാനാകില്ലെന്നാണ് കത്തിലെ പ്രധാന നിലപാട്.

ചീഫ് ഇലക്ഷൻ കമ്മീഷണർ ജ്ഞാനേഷ് കുമാറിനെയും തെരഞ്ഞെടുപ്പ് കമ്മീഷനെയും ലക്ഷ്യമിട്ട് ഉയരുന്ന ‘വോട്ട് മോഷണം’ ആരോപണങ്ങളെയാണ് മുൻ ജഡ്ജിമാർ പ്രത്യേകമായി ചോദ്യം ചെയ്തത്. ഭരണഘടനാ അധികാരികളെ ‘കള്ളന്മാർ’, ‘പാവകൾ’, ‘വിശ്വാസ്യതയില്ലാത്തവർ’ എന്നിങ്ങനെ വിശേഷിപ്പിക്കുന്നത് പൊതുജനങ്ങളുടെ വിശ്വാസത്തെ ബാധിക്കാമെന്നും കത്തിൽ പറയുന്നു. സ്ഥാപനങ്ങളെ വിമർശിക്കുന്നത് ജനാധിപത്യ അവകാശമാണെങ്കിലും അവയെ അപകീർത്തിപ്പെടുത്തുന്നത് അതിൽനിന്ന് വ്യത്യസ്തമാണെന്നും മുൻ ജഡ്ജിമാർ വ്യക്തമാക്കി. സുപ്രീംകോടതി മുൻ ജഡ്ജിമാരായ ജസ്റ്റിസ് ഹേമന്ത് ഗുപ്ത, ജസ്റ്റിസ് പങ്കജ് മിത്തൽ എന്നിവരടക്കം മുൻ സുപ്രീംകോടതി, ഹൈക്കോടതി ജഡ്ജിമാരാണ് കത്തിൽ ഒപ്പുവച്ചത്.

വോട്ടർപട്ടികയിലെ പ്രത്യേക തീവ്ര പരിഷ്‌കരണത്തെയും മുൻ ജഡ്ജിമാർ കത്തിൽ പിന്തുണച്ചു. വോട്ടർപട്ടിക കൂടുതൽ കൃത്യവും വിശ്വാസയോഗ്യവുമാക്കുന്നതിനായി നിയമപരമായി അനുവദിച്ചിട്ടുള്ള നടപടിയാണ് എസ്‌ഐആർ എന്നാണ് അവരുടെ വിശദീകരണം. തെരഞ്ഞെടുപ്പ് സംവിധാനവുമായി ബന്ധപ്പെട്ട പരാതികളും ആരോപണങ്ങളും രാഷ്ട്രീയ പാർട്ടികൾ നിയമപരവും ഭരണഘടനാപരവുമായ മാർഗങ്ങളിലൂടെ ഉന്നയിക്കണമെന്നും തെളിവുകളോടെയാണ് വിഷയങ്ങൾ കോടതിയിലോ ബന്ധപ്പെട്ട സ്ഥാപനങ്ങളിലോ അവതരിപ്പിക്കേണ്ടതെന്നും അവർ ആവശ്യപ്പെട്ടു. അതേസമയം, എസ്‌ഐആറിനെതിരെയും തെരഞ്ഞെടുപ്പ് കമ്മീഷന്റെ പ്രവർത്തനങ്ങളെക്കുറിച്ചും പ്രതിപക്ഷം ശക്തമായ ആരോപണങ്ങളാണ് ഉന്നയിക്കുന്നത്. ഈ ആരോപണങ്ങൾ തെരഞ്ഞെടുപ്പ് കമ്മീഷനും ബിജെപിയും തള്ളിയിട്ടുണ്ട്.

തെരഞ്ഞെടുപ്പ് കമ്മീഷനെതിരായ പ്രതിഷേധം ഡൽഹിയിലും ശക്തമായ സാഹചര്യത്തിലാണ് മുൻ ജഡ്ജിമാരുടെ കത്ത് പുറത്തുവന്നത്. ഭരണഘടനാ സ്ഥാപനങ്ങളിലുള്ള പൊതുജന വിശ്വാസം ജനാധിപത്യത്തിന്റെ പ്രധാന ഘടകമാണെന്നും തെളിവില്ലാത്ത ആരോപണങ്ങൾ തുടർച്ചയായി ഉയർത്തുന്നത് ആ വിശ്വാസത്തെ ബാധിക്കാമെന്നുമാണ് കത്തിലെ മുന്നറിയിപ്പ്. അതേസമയം, ഭരണഘടനാ സ്ഥാപനങ്ങളുടെ തീരുമാനങ്ങളെ ചോദ്യം ചെയ്യാനുള്ള അവകാശം ജനാധിപത്യത്തിൽ നിലനിൽക്കുന്നുവെന്നതും കത്ത് വ്യക്തമാക്കുന്നു. അതുകൊണ്ടുതന്നെ തെരഞ്ഞെടുപ്പ് കമ്മീഷന്റെ പ്രവർത്തനം, എസ്‌ഐആർ, ‘വോട്ട് മോഷണം’ ആരോപണങ്ങൾ എന്നിവയെ ചുറ്റിപ്പറ്റിയുള്ള രാഷ്ട്രീയ-നിയമ പോരാട്ടം വരും ദിവസങ്ങളിലും കൂടുതൽ ശ്രദ്ധ നേടാനാണ് സാധ്യത.

Content Highlights: 42 former judges issued an open letter warning against unsourced vote theft allegations undermining the Election Commission and judiciary. They highlighted how such campaigns erode democracy and public trust.