ഇന്ത്യ ജന്മഭൂമി, കർണാടക കർമഭൂമി; ദാദാസാഹേബ് ഫാൽക്കെ പുരസ്കാരം ഏറ്റുവാങ്ങി അനന്ത് നാഗ്

ഏഴ് പതിറ്റാണ്ടിലേറെ നീണ്ട അഭിനയജീവിതത്തിന് ഒടുവിൽ ഇന്ത്യൻ സിനിമയിലെ പരമോന്നത ബഹുമതികളിലൊന്നായ ദാദാസാഹേബ് ഫാൽക്കെ പുരസ്കാരം ഏറ്റുവാങ്ങി മുതിർന്ന കന്നഡ നടൻ അനന്ത് നാഗ്. 2024ലെ പുരസ്കാരം ഗുജറാത്തിലെ ഏകതാ നഗറിൽ നടന്ന 72-ാമത് ദേശീയ ചലച്ചിത്ര പുരസ്കാര ചടങ്ങിൽ രാഷ്ട്രപതി ദ്രൗപതി മുർമുവിൽ നിന്നാണ് അദ്ദേഹം സ്വീകരിച്ചത്. കന്നഡ സിനിമയ്ക്ക് നൽകിയ വലിയ സംഭാവന പരിഗണിച്ചാണ് പുരസ്കാരം. ഡോ. രാജ്കുമാറിന് ശേഷം ഈ ബഹുമതി നേടുന്ന രണ്ടാമത്തെ കന്നഡ നടനാണ് അനന്ത് നാഗ്.

പുരസ്കാരം നിർമാതാക്കൾക്കും സംവിധായകർക്കും ഒപ്പം പതിറ്റാണ്ടുകളായി തന്റെ കഥാപാത്രങ്ങളെ സ്വീകരിച്ച കോടിക്കണക്കിന് പ്രേക്ഷകർക്കും സമർപ്പിക്കുന്നതായി അനന്ത് നാഗ് പറഞ്ഞു. വിവിധ ഭാഷകളിൽ അഭിനയിച്ചിട്ടുണ്ടെങ്കിലും ഏറ്റവും കൂടുതൽ സ്നേഹവും ബഹുമാനവും ലഭിച്ചതായി തോന്നിയത് കർണാടകയിൽ നിന്നാണെന്നും അദ്ദേഹം വ്യക്തമാക്കി. ആശ്രമത്തിൽ 12 വയസ്സ് വരെ വളർന്നതും പിന്നീട് മുംബൈയിൽ നാടകത്തിലൂടെ അഭിനയരംഗത്തേക്ക് എത്തിയതും അനന്ത് നാഗ് പ്രസംഗത്തിൽ ഓർത്തെടുത്തു. “ഇന്ത്യ എന്റെ ജന്മഭൂമിയും, കർണാടക എന്റെ കർമഭൂമിയും, ഭാരതം എന്റെ ധർമഭൂമിയുമാണ്” എന്ന വാക്കുകളോടെയാണ് അദ്ദേഹം പ്രസംഗം അവസാനിപ്പിച്ചത്.

1948 സെപ്റ്റംബർ 4ന് ജനിച്ച അനന്ത് നാഗ് 1973ൽ ‘സങ്കൽപ്പ’യിലൂടെയാണ് സിനിമയിലെത്തിയത്. തുടർന്ന് ശ്യാം ബെനഗലിന്റെ ‘അങ്കുർ’, ‘മന്തൻ’, ‘ഭൂമിക’ തുടങ്ങിയ ചിത്രങ്ങളിലൂടെയും കന്നഡയിലെ ‘ബയലു ദാരി’, ‘കന്നേശ്വര രാമ’, ‘നാ നിന്ന ബിടലാരെ’, ‘ചന്ദനത ഗൊമ്പെ’, ‘ബെങ്കിയ ബാളെ’ തുടങ്ങിയ സിനിമകളിലൂടെയും ശ്രദ്ധേയനായി. കന്നഡ, ഹിന്ദി, തെലുങ്ക്, തമിഴ്, മലയാളം, മറാത്തി, ഇംഗ്ലീഷ് ഭാഷകളിലായി 300ലേറെ ചിത്രങ്ങളിൽ അഭിനയിച്ചു. സഹോദരൻ ശങ്കർ നാഗ് സംവിധാനം ചെയ്ത ‘മാൽഗുഡി ഡേയ്സ്’ ടെലിവിഷൻ പരമ്പരയിലൂടെയും അദ്ദേഹം രാജ്യവ്യാപകമായി ശ്രദ്ധ നേടി. ‘മുങ്കരു മാലേ’, ‘ഗോധി ബന്ന സാധാരണ മൈകട്ടു’, ‘രാജ്കുമാര’, ‘കെ.ജി.എഫ്: ചാപ്റ്റർ 1’ തുടങ്ങിയ ചിത്രങ്ങളിലൂടെ പുതിയ തലമുറയിലും സാന്നിധ്യം നിലനിർത്തി.

ഫിലിംഫെയർ അവാർഡ് സൗത്ത്, കർണാടക സംസ്ഥാന ചലച്ചിത്ര പുരസ്കാരങ്ങൾ, കർണാടക രാജ്യോത്സവ പുരസ്കാരം, കർണാടക സംസ്ഥാന ലൈഫ് ടൈം അച്ചീവ്മെന്റ് പുരസ്കാരം എന്നിവയും അനന്ത് നാഗിന് ലഭിച്ചിട്ടുണ്ട്. 2025ൽ പത്മഭൂഷണും ലഭിച്ചു. 72-ാമത് ദേശീയ ചലച്ചിത്ര പുരസ്കാരത്തിൽ ‘അമരൻ’ സംവിധായകൻ രാജ്കുമാർ പെരിയസാമിക്ക് മികച്ച സംവിധായക പുരസ്കാരവും ‘ഭ്രമയുഗം’, ‘ചന്തു ചാംപ്യൻ’ ചിത്രങ്ങളിലെ അഭിനയത്തിന് മമ്മൂട്ടിക്കും കാർത്തിക് ആര്യനും മികച്ച നടനുള്ള പുരസ്കാരവും ലഭിച്ചു. ‘ആർട്ടിക്കിൾ 370’ മികച്ച ഫീച്ചർ ചിത്രമായപ്പോൾ യാമി ഗൗതം മികച്ച നടിയായി; ‘കൽക്കി 2898 എഡി’ മികച്ച വിനോദാത്മക ജനപ്രിയ ചിത്രമായി. വൈക്കം വിജയലക്ഷ്മി മികച്ച ഗായികയായി. ഡൽഹിക്ക് പുറത്ത് ആദ്യമായി ഗുജറാത്തിലെ ഏകതാ നഗറിൽ നടന്ന ചടങ്ങിൽ ഫീച്ചർ, നോൺ-ഫീച്ചർ, സിനിമയെക്കുറിച്ചുള്ള എഴുത്ത് വിഭാഗങ്ങളിലായി 92 വിജയികളെയാണ് ആദരിച്ചത്.