വാഷിംഗ്ടൺ: ഇറാനിലെ ആഭ്യന്തര സാഹചര്യങ്ങൾ അതീവ ഗുരുതരമാണെന്നും രാജ്യം വലിയ തകർച്ചയെ നേരിടുകയാണെന്നും അമേരിക്കൻ പ്രസിഡന്റ് ഡോണൾഡ് ട്രംപ് പ്രസ്താവിച്ചു. തന്റെ സോഷ്യൽ മീഡിയ പ്ലാറ്റ്ഫോമായ ട്രൂത്ത് സോഷ്യലിലൂടെയാണ് ട്രംപ് ഇക്കാര്യം വ്യക്തമാക്കിയത്. ഇറാൻ ഭരണകൂടം നിലവിൽ കടുത്ത നേതൃത്വ പ്രതിസന്ധിയിലൂടെയാണ് കടന്നുപോകുന്നതെന്നും, ഇതിന്റെ പശ്ചാത്തലത്തിൽ നിലവിൽ അടച്ചിട്ടിരിക്കുന്ന ഹോർമുസ് കടലിടുക്ക് എത്രയും വേഗം തുറന്നുനൽകാൻ ഇറാൻ സന്നദ്ധത അറിയിച്ചതായും ട്രംപ് കൂട്ടിച്ചേർത്തു.
അമേരിക്ക-ഇസ്രയേൽ സഖ്യവും ഇറാനും തമ്മിലുള്ള സംഘർഷം കടുക്കുന്നതിനിടെയാണ് ആഗോള വ്യാപാരത്തിന്റെ പ്രധാന കേന്ദ്രമായ ഹോർമുസ് കടലിടുക്ക് അടയ്ക്കപ്പെട്ടത്. ഇതേത്തുടർന്ന് ലോകത്തിന്റെ വിവിധ ഭാഗങ്ങളിൽ നിന്നുള്ള ഏകദേശം രണ്ടായിരത്തോളം കപ്പലുകളാണ് നിലവിൽ മേഖലയിൽ കുടുങ്ങിക്കിടക്കുന്നത്. ആഗോള എണ്ണ വിതരണത്തെയും ചരക്ക് നീക്കത്തെയും ഈ പ്രതിസന്ധി ദോഷകരമായി ബാധിച്ചിരിക്കുകയാണ്. കപ്പലുകളുടെ ഗതാഗതം പുനഃസ്ഥാപിക്കണമെന്ന് അന്താരാഷ്ട്ര തലത്തിൽ സമ്മർദ്ദം ശക്തമാണ്.
തങ്ങളുടെ തുറമുഖങ്ങൾക്കെതിരെ അമേരിക്ക ഏർപ്പെടുത്തിയ ഉപരോധം പിൻവലിച്ചാൽ ഹോർമുസ് കടലിടുക്ക് തുറന്നുനൽകാമെന്ന ഒരു താൽക്കാലിക കരാറിന് തയ്യാറാണെന്ന് ഇറാൻ അറിയിച്ചിട്ടുണ്ട്. എന്നാൽ ഉപരോധം അവസാനിപ്പിക്കുന്നത് സംബന്ധിച്ചോ മേഖലയിലെ സംഘർഷങ്ങൾക്ക് ശാശ്വത പരിഹാരം കാണുന്നതിനെക്കുറിച്ചോ ഇരുരാജ്യങ്ങളും ഇതുവരെ അന്തിമ ധാരണയിൽ എത്തിയിട്ടില്ല. ഇറാൻ നേരിടുന്ന സാമ്പത്തികവും രാഷ്ട്രീയവുമായ വെല്ലുവിളികൾ ചർച്ചകളിലൂടെ പരിഹരിക്കപ്പെടുമോ എന്നാണ് ലോകം ഉറ്റുനോക്കുന്നത്.