ഭൂമിയിലെ ഇന്നത്തെ ഭൂഖണ്ഡങ്ങൾ കോടിക്കണക്കിന് വർഷങ്ങളായുള്ള നിരന്തരമായ മാറ്റങ്ങളിലൂടെയാണ് രൂപപ്പെട്ടതെന്ന് ശാസ്ത്രം തെളിയിച്ചിട്ടുണ്ട്. അങ്ങനെയെങ്കിൽ, ദശലക്ഷക്കണക്കിന് വർഷങ്ങൾക്ക് മുമ്പ് നിങ്ങൾ ഇപ്പോൾ നിൽക്കുന്ന സ്ഥലം അല്ലെങ്കിൽ നിങ്ങളുടെ വീട് എവിടെയായിരുന്നിരിക്കാം? ഈ ചോദ്യത്തിന് കൃത്യമായ ഉത്തരം നൽകുന്ന ഒരു പുതിയ ഓൺലൈൻ ടൂൾ വികസിപ്പിച്ചിരിക്കുകയാണ് ഉട്രെക്റ്റ് സർവകലാശാലയിലെ പ്രൊഫസർ ഡൗവെ വാൻ ഹിൻസ്ബെർഗന്റെ നേതൃത്വത്തിലുള്ള അന്താരാഷ്ട്ര ഭൗമശാസ്ത്രജ്ഞരുടെ സംഘം. ഭൂമിയിലെ ഏത് സ്ഥലത്തിന്റെയും കാലാന്തരത്തിലുള്ള ഭൂമിശാസ്ത്രപരമായ യാത്ര ഈ ടൂളിലൂടെ വെളിപ്പെടും.
‘പാൻജിയ’ എന്നറിയപ്പെടുന്ന സൂപ്പർ ഭൂഖണ്ഡം നിലനിന്നിരുന്ന 320 ദശലക്ഷം വർഷങ്ങൾക്ക് മുമ്പുള്ള കാലഘട്ടത്തിലേക്ക് വരെ ഈ ടൂളിലൂടെ ഉപയോക്താക്കൾക്ക് എത്തിനോക്കാൻ സാധിക്കും. കാലക്രമേണ ടെക്ടോണിക് പ്ലേറ്റുകൾ ചലിച്ചുകൊണ്ടിരുന്നതിനാൽ, നമ്മൾ ഇന്ന് കാണുന്ന പല സ്ഥലങ്ങളും അക്കാലത്ത് തികച്ചും വ്യത്യസ്തമായ കാലാവസ്ഥാ മേഖലകളിലായിരുന്നു. ഉദാഹരണത്തിന്, 245 ദശലക്ഷം വർഷങ്ങൾക്ക് മുമ്പ് നെതർലൻഡ്സിന് ഇന്നത്തെ പേർഷ്യൻ ഗൾഫിന് സമാനമായ ഉഷ്ണമേഖലാ കാലാവസ്ഥയായിരുന്നുവെന്ന് ഗവേഷകർ കണ്ടെത്തിയിട്ടുണ്ട്. വൻകരകളുടെയും പർവതനിരകളുടെയും അതിസൂക്ഷ്മമായ പുനർനിർമാണത്തിനായി ‘ഉട്രെക്റ്റ് പാലിയോജിയോഗ്രഫി മോഡൽ’ ആണ് ഈ പ്രൊജക്റ്റിനായി ഉപയോഗിച്ചിരിക്കുന്നത്. പുരാതന ശിലകളിൽ സൂക്ഷിക്കപ്പെട്ടിട്ടുള്ള കാന്തിക സിഗ്നലുകൾ നിരീക്ഷിച്ചാണ് ശാസ്ത്രജ്ഞർ ഈ മാതൃക തയ്യാറാക്കിയത്.
പൊതുജനങ്ങൾക്ക് ഭൂമിയുടെ ചരിത്രത്തെക്കുറിച്ച് കൗതുകമുണർത്തുന്ന വിവരങ്ങൾ നൽകുന്നതിനൊപ്പം ശാസ്ത്രലോകത്തിനും ഈ ടൂൾ ഏറെ പ്രയോജനകരമാണ്. കഴിഞ്ഞകാലങ്ങളിൽ സംഭവിച്ചിട്ടുള്ള കടുത്ത കാലാവസ്ഥാ വ്യതിയാനങ്ങളോടും ജീവികളുടെ കൂട്ടവംശനാശങ്ങളോടും ജൈവവൈവിധ്യം എങ്ങനെയാണ് പ്രതികരിച്ചതെന്ന് മനസ്സിലാക്കാൻ ഇത് വിദഗ്ധരെ സഹായിക്കുമെന്ന് പാലിയെന്റോളജിസ്റ്റായ ഡോ. എമിലിയ യാരോഹോവ്സ്ക വ്യക്തമാക്കി. ഭൂമിയുടെ പുരാതന ചരിത്രത്തെയും ആധുനിക മനുഷ്യനെയും തമ്മിൽ ബന്ധിപ്പിക്കുന്ന മികച്ചൊരു മാധ്യമമായാണ് ഈ ഉപകരണം വിലയിരുത്തപ്പെടുന്നത്.