കൊച്ചി: സീസണിലെ മോശം പ്രകടനത്തെത്തുടർന്ന് മത്സരങ്ങൾ ബഹിഷ്കരിക്കാൻ തീരുമാനിച്ച ആരാധകകൂട്ടായ്മയായ മഞ്ഞപ്പടയോട് സ്റ്റേഡിയത്തിലേക്ക് മടങ്ങിവരണമെന്ന് കേരള ബ്ലാസ്റ്റേഴ്സ് ഹെഡ് കോച്ച് ആഷ്ലി വെസ്റ്റ്വുഡ് അഭ്യർത്ഥിച്ചു. ടീം മാനേജ്മെന്റിന്റെ നിലപാടുകളിലും കളിക്കളത്തിലെ മോശം ഫോമിലും പ്രതിഷേധിച്ചാണ് ആരാധകർ ബഹിഷ്കരണം പ്രഖ്യാപിച്ചത്. ഈ പശ്ചാത്തലത്തിൽ, കൊച്ചിയിൽ നോർത്ത് ഈസ്റ്റ് യുണൈറ്റഡിനെതിരെ നടക്കാനിരിക്കുന്ന നിർണ്ണായക ഹോം മത്സരത്തിന് മുന്നോടിയായാണ് ആരാധകരുടെ പിന്തുണ തേടി കോച്ച് രംഗത്തെത്തിയത്. ആരാധകരില്ലാത്ത ഗാലറി ടീമിന് വലിയ നഷ്ടമാണെന്നും അദ്ദേഹം കൂട്ടിച്ചേർത്തു.
ഇനിയുള്ള മത്സരങ്ങളിൽ ആരാധകർ ആഗ്രഹിക്കുന്ന വിജയവും മികച്ച പ്രകടനവും ഉറപ്പുനൽകുന്നതായും കോച്ച് വ്യക്തമാക്കി. ബെംഗളൂരു എഫ്സിക്കെതിരെ അവരുടെ തട്ടകത്തിൽ നേടിയ സീസണിലെ ആദ്യ വിജയം ടീമിന് വലിയ ആത്മവിശ്വാസം നൽകിയിട്ടുണ്ട്. ആരാധകർ അർഹിക്കുന്ന നിലവാരത്തിലേക്ക് ടീം ഉയരുമെന്നും വിജയങ്ങൾ തുടർക്കഥയാകുമെന്നും ആഷ്ലി വെസ്റ്റ്വുഡ് പറഞ്ഞു. പ്രതിഷേധം തുടരുന്നതിനാൽ കഴിഞ്ഞ രണ്ട് മത്സരങ്ങളിലും മഞ്ഞപ്പടയുടെ സാന്നിധ്യം ഗാലറിയിൽ ഉണ്ടായിരുന്നില്ല. കോച്ചിന്റെ പുതിയ ഉറപ്പുകൾ ആരാധകരെ വീണ്ടും സ്റ്റേഡിയത്തിലേക്ക് എത്തിക്കുമോ എന്നാണ് കായികലോകം ഉറ്റുനോക്കുന്നത്.