ആൻഡ്രോയിഡ് സ്മാർട്ട്ഫോണുകളെ ലക്ഷ്യമിട്ട് അത്യന്തം അപകടകാരിയായ പുതിയൊരു മാൽവെയർ വകഭേദം പടരുന്നതായി സൈബർ സുരക്ഷാ വിദഗ്ധർ മുന്നറിയിപ്പ് നൽകുന്നു. സാധാരണ വൈറസുകളിൽ നിന്നും വിഭിന്നമായി, ഫോണിൽ നിന്ന് ഡിലീറ്റ് ചെയ്താലും നിശബ്ദമായി തിരിച്ചുവരാനുള്ള കഴിവാണ് ഇതിനെ കൂടുതൽ ഭയപ്പെടുത്തുന്നത്. മൂന്നാം കക്ഷി വെബ്സൈറ്റുകളിൽ നിന്നുള്ള എപികെ ഫയലുകൾ, ഫിഷിംഗ് ലിങ്കുകൾ, മറ്റ് ആപ്പ് ഷെയറിംഗ് പ്ലാറ്റ്ഫോമുകൾ എന്നിവ വഴിയാണ് ഇവ പ്രധാനമായും ഉപകരണങ്ങളിൽ എത്തുന്നത്. ഇൻസ്റ്റാൾ ചെയ്തുകഴിഞ്ഞാൽ ഒരു സാധാരണ ആപ്പായി നടിച്ച് പ്രവർത്തിക്കുന്നതിനാൽ ഉപയോക്താക്കൾക്ക് പെട്ടെന്ന് സംശയം തോന്നുകയുമില്ല.
ഉപകരണത്തിന്റെ പൂർണ്ണ നിയന്ത്രണം ഏറ്റെടുക്കുന്നതിനായി ഫോണിലെ ‘ആക്സസിബിലിറ്റി’ അനുമതികളാണ് ഈ മാൽവെയർ പ്രധാനമായും ദുരുപയോഗം ചെയ്യുന്നത്. ഒരിക്കൽ ഈ അനുമതി ലഭിച്ചാൽ, ഫോൺ സെറ്റിംഗുകളിൽ മാറ്റം വരുത്താനും പശ്ചാത്തലത്തിൽ ആപ്പുകൾ പ്രവർത്തിപ്പിക്കാനും ഇതിന് സാധിക്കും. ഉപയോക്താവ് ആപ്പ് നീക്കം ചെയ്താലും, ബാക്കപ്പ് ഫയലുകളിലോ സിസ്റ്റം പ്രോസസ്സുകൾക്കുള്ളിലോ ഒളിച്ചിരുന്ന് വീണ്ടും ഇൻസ്റ്റാൾ ചെയ്യപ്പെടാനുള്ള സാങ്കേതിക വിദ്യയും ഇതിനുണ്ട്. പെട്ടെന്ന് ബാറ്ററി തീരുക, അനാവശ്യ പോപ്പ്-അപ്പുകൾ പ്രത്യക്ഷപ്പെടുക, ഡാറ്റ ഉപയോഗം വർദ്ധിക്കുക, ഇൻസ്റ്റാൾ ചെയ്യാത്ത ആപ്പുകൾ ഫോണിൽ കാണപ്പെടുക എന്നിവയാണ് ഇതിന്റെ പ്രധാന ലക്ഷണങ്ങൾ.
ഫോൺ സുരക്ഷിതമാക്കാൻ ചില മുൻകരുതലുകൾ അത്യാവശ്യമാണെന്ന് വിദഗ്ധർ നിർദ്ദേശിക്കുന്നു. ഫോണിൽ അസാധാരണമായ മാറ്റങ്ങൾ കണ്ടാൽ ഉടൻ ഇന്റർനെറ്റ് വിച്ഛേദിച്ച് ‘സേഫ് മോഡിൽ’ റീസ്റ്റാർട്ട് ചെയ്യുക. അപരിചിതമായ ആപ്പുകൾ നീക്കം ചെയ്യുകയും ആക്സസിബിലിറ്റി, ഡിവൈസ് അഡ്മിനിസ്ട്രേറ്റർ അനുമതികൾ പരിശോധിക്കുകയും വേണം. പ്രശ്നം പരിഹരിക്കപ്പെടാത്ത പക്ഷം ഫാക്ടറി റീസെറ്റ് മാത്രമാണ് ഏക പോംവഴി. സുരക്ഷ ഉറപ്പാക്കാൻ ഗൂഗിൾ പ്ലേ സ്റ്റോറിൽ നിന്ന് മാത്രം ആപ്പുകൾ ഡൗൺലോഡ് ചെയ്യാനും ഫോൺ സോഫ്റ്റ്വെയറുകൾ കൃത്യമായി അപ്ഡേറ്റ് ചെയ്യാനും ശ്രദ്ധിക്കേണ്ടതാണ്.