ആഗോള ബിയർ വിപണിയിൽ തങ്ങളുടെ സാന്നിധ്യം ശക്തമാക്കാനുള്ള വൻ ഒരുക്കങ്ങളിലാണ് ഇന്ത്യയിലെ മുൻനിര ബിയർ ബ്രാൻഡുകൾ. കിംഗ്ഫിഷർ, ബിറ 91, ബീയങ്, ഗോഡ്ഫാദർ, മെഡൂസ തുടങ്ങിയ പ്രമുഖ ഇന്ത്യൻ ബ്രാൻഡുകളാണ് അന്താരാഷ്ട്ര വിപണി ലക്ഷ്യമിട്ട് നീക്കങ്ങൾ നടത്തുന്നത്. വലിയ മാറ്റങ്ങളാണ് ഇപ്പോൾ ആഗോള ബിയർ വിപണിയിൽ ദൃശ്യമാകുന്നത്. 2024-ൽ ഏകദേശം 839.31 ബില്യൺ ഡോളർ മൂല്യമുണ്ടായിരുന്ന ആഗോള വിപണി, 6.8 ശതമാനം വാർഷിക വളർച്ചയോടെ 2030 ആകുമ്പോഴേക്കും 1,248.3 ബില്യൺ ഡോളറിൽ എത്തുമെന്നാണ് കണക്കാക്കുന്നത്. ഈ വമ്പൻ വിപണിയിലേക്കാണ് ഇന്ത്യൻ കമ്പനികൾ ഇപ്പോൾ കണ്ണ് വെച്ചിരിക്കുന്നത്.
ഇന്ത്യൻ ഉപഭോക്താക്കളുടെ താല്പര്യങ്ങളിൽ വന്ന ഗുണപരമായ മാറ്റമാണ് ഈ പുതിയ ചുവടുവെപ്പിന് പിന്നിലെ പ്രധാന കാരണം. പണ്ട് ‘സ്ട്രോങ്ങ്’ ബിയറുകളോട് താല്പര്യം കാണിച്ചിരുന്നവർ ഇന്ന് പ്രീമിയം, സ്മൂത്ത് ബിയറുകളിലേക്കും ക്രാഫ്റ്റ് ബിയറുകളിലേക്കും മാറിയിരിക്കുന്നു. നിലവാരമുള്ള ബിയറുകൾ നിർമ്മിക്കുന്നതിലും മികച്ച ബ്രാൻഡിംഗ് നടത്തുന്നതിലും ഇന്ത്യൻ കമ്പനികൾ കൈവരിച്ച വൈദഗ്ധ്യം വിദേശ വിപണിയിൽ മത്സരിക്കാൻ അവർക്ക് വലിയ ആത്മവിശ്വാസം നൽകുന്നുണ്ട്.
വിദേശ വിപണിയിലേക്ക് കടക്കുമ്പോൾ ഇന്ത്യൻ ബ്രാൻഡുകൾ ആദ്യ മുൻഗണന നൽകുന്നത് ഗൾഫ് മേഖലയ്ക്കാണ്. ഇവിടെയുള്ള വലിയൊരു വിഭാഗം ജനങ്ങൾക്ക് ഇന്ത്യയുമായുള്ള വൈകാരിക ബന്ധവും, സമാനമായ രുചി താല്പര്യങ്ങളുമാണ് ഇതിന് കാരണം. ലോകമെമ്പാടുമുള്ള ഇന്ത്യൻ പ്രവാസികൾ ഈ ബ്രാൻഡുകളുടെ ആദ്യകാല അംബാസഡർമാരായി മാറുന്നു എന്നതും ശ്രദ്ധേയമാണ്. ഇത് പുതിയ അന്താരാഷ്ട്ര വിപണികളിൽ വേരൂന്നാൻ കമ്പനികളെ ഏറെ സഹായിക്കുന്നു.
വിദേശ രാജ്യങ്ങളിലേക്ക് മദ്യം കയറ്റുമതി ചെയ്യുന്നത് അത്ര എളുപ്പമുള്ള കാര്യമല്ല. ഓരോ രാജ്യത്തിനും അതിന്റേതായ കർശനമായ നിയമങ്ങളും നിയന്ത്രണങ്ങളുമുണ്ട്. ലൈസൻസ് നേടുക, ലേബലിംഗ്, ഉയർന്ന ഇറക്കുമതി തീരുവ, പരസ്യങ്ങൾക്കുള്ള നിയന്ത്രണങ്ങൾ എന്നിവ വലിയ വെല്ലുവിളികളാണ് ഉയർത്തുന്നത്. ഇവ മറികടക്കാനായി വിദേശങ്ങളിലെ പ്രാദേശിക കമ്പനികളുമായി കൈകോർക്കാനാണ് ഇന്ത്യൻ ബ്രാൻഡുകൾ ശ്രമിക്കുന്നത്. ഇതോടൊപ്പം ബിയറിന്റെ ഗുണനിലവാരം ഒട്ടും ചോർന്നുപോകാതെ വിദേശ വിപണികളിൽ എത്തിക്കാൻ ശക്തമായ ഒരു വിതരണ ശൃംഖല ഉറപ്പുവരുത്തേണ്ടതും ഈ കമ്പനികൾക്ക് മുന്നിലുള്ള വലിയ ഉത്തരവാദിത്തമാണ്.