കൊച്ചി: കോക്രോച്ച് ജനതാ പാർട്ടി കേരളത്തിലും പ്രതിഷേധത്തിനൊരുങ്ങുന്നു. തീവ്ര വോട്ടർ പട്ടിക പരിഷ്കരണ നടപടിയായ എസ്.ഐ.ആറിനെതിരെ കൊച്ചിയിൽ സമരം പ്രഖ്യാപിച്ചിരിക്കുകയാണ് സംഘടന. ഡൽഹിയിലെ ജന്തർ മന്തറിൽ പ്രതിഷേധം സംഘടിപ്പിക്കാൻ ശ്രമിച്ചതിന് നേതാക്കൾ അറസ്റ്റിലായതിന് പിന്നാലെയാണ് കേരളത്തിൽ പുതിയ പ്രതിഷേധ പരിപാടിയുമായി പാർട്ടി രംഗത്തെത്തിയിരിക്കുന്നത്. നവംബർ 7 ശനിയാഴ്ച വൈകുന്നേരം നാലിന് കൊച്ചിയിലെ രാജേന്ദ്ര മൈതാനത്താണ് പ്രതിഷേധം നടക്കുക. ‘ജനാധിപത്യം സംരക്ഷിക്കുക, എസ്.ഐ.ആർ റദ്ദാക്കുക’ എന്ന മുദ്രാവാക്യത്തോടെയാണ് പരിപാടി സംഘടിപ്പിക്കുന്നത്. പാർട്ടി സ്ഥാപകൻ അഭിജീത് ദിപ്കെ, സൗത്ത് സോൺ തലവൻ വിജയ് മല്ലാങ്കി, ദേശീയ സെക്രട്ടറി അഫ്രീൻ നവാസ് എന്നിവർ പ്രതിഷേധത്തിൽ പങ്കെടുക്കും. ‘ജന്തർ മന്തർ @ കൊച്ചി’ എന്നാണ് പരിപാടിക്ക് നൽകിയിരിക്കുന്ന പേര്. കഴിഞ്ഞ മാസം ഡൽഹിയിലെ ജന്തർ മന്തറിൽ ഗ്യാനേഷ് കുമാറിനെതിരെയും എസ്.ഐ.ആർ നടപടിക്കെതിരെയും അനുമതിയില്ലാതെ പ്രതിഷേധം സംഘടിപ്പിക്കാൻ ശ്രമിച്ചതിനെ തുടർന്നാണ് ദിപ്കെയെയും അശുതോഷ് റാങ്ക, സൗരവ് ദാസ് എന്നിവരെയും ഡൽഹി പോലീസ് കസ്റ്റഡിയിലെടുത്തത്. ഇതിന് പിന്നാലെ ജന്തർ മന്തറിലെ പ്രതിഷേധ വേദിയുടെ ഔദ്യോഗിക പദവി സർക്കാർ പിൻവലിച്ചിരുന്നു. ഈ സംഭവങ്ങൾക്കു ശേഷമുള്ള സംഘടനയുടെ ആദ്യത്തെ പ്രധാന പ്രതിഷേധ നീക്കമാണ് കൊച്ചിയിലേത്. ഡൽഹിയിൽ ആരംഭിച്ച എസ്.ഐ.ആർ വിരുദ്ധ പ്രതിഷേധം കേരളത്തിലേക്കും വ്യാപിപ്പിക്കാനുള്ള നീക്കമായാണ് കൊച്ചിയിലെ പരിപാടി വിലയിരുത്തപ്പെടുന്നത്. വോട്ടർ പട്ടിക പരിഷ്കരണ നടപടിക്കെതിരായ തങ്ങളുടെ നിലപാട് പൊതുജനങ്ങളിലേക്ക് എത്തിക്കുകയാണ് കോക്രോച്ച് ജനതാ പാർട്ടിയുടെ ലക്ഷ്യം. ശനിയാഴ്ചത്തെ പ്രതിഷേധത്തിൽ എത്രത്തോളം ജനപങ്കാളിത്തമുണ്ടാകുമെന്നാണ് ഇനി ശ്രദ്ധേയം. Content Highlights: The ‘Cockroach Janata Party’ is gearing up for protests in Kerala as well. The organization has announced an agitation in Kochi against the ‘SIR’ (a radical voter list reform measure). This move in Kerala follows the arrest of the party’s leaders in Delhi, who had attempted to organize a protest at Jantar Mantar. Post navigation ഒന്നേകാൽ മണിക്കൂർ ഫോൺ ഹോൾഡ് ചെയ്തു; കൊലപാതകത്തിനിടെ വീട്ടിലിരുന്നെന്ന് തെളിയിക്കാൻ ഉമറിന്റെ ‘കുബുദ്ധി’!
