ഷറഫുദീനെ നായകനാക്കി വിഷ്ണു അരവിന്ദ് സംവിധാനം ചെയ്യുന്ന ഫാമിലി റൊമാന്റിക് കോമഡി ചിത്രം ‘മധുവിധു’ ഏപ്രിൽ 17-ന് ആഗോളതലത്തിൽ തിയേറ്ററുകളിലെത്തും. നേരത്തെ മെയ് ഒന്നിന് റിലീസ് ചെയ്യാനിരുന്ന ചിത്രം, പ്രേക്ഷകരുടെ കാത്തിരിപ്പിനൊടുവിൽ വിഷു റിലീസായാണ് എത്തുന്നത്. അജിത് വിനായക ഫിലിംസിന്റെ ബാനറിൽ വിനായക അജിത് നിർമ്മിക്കുന്ന ഈ ചിത്രം, സ്ത്രീകളില്ലാത്ത അഞ്ച് പുരുഷന്മാരുടെ കുടുംബ പശ്ചാത്തലത്തിലാണ് കഥ പറയുന്നത്. ആദ്യാവസാനം ചിരി പടർത്തുന്ന ഒരു ഫൺ എന്റർടൈനറായിരിക്കും ഇതെന്ന സൂചനയാണ് പുറത്തിറങ്ങിയ ടീസറും പോസ്റ്ററുകളും നൽകുന്നത്.
പ്രശസ്ത നടി ബിന്ദു പണിക്കരുടെ മകൾ കല്യാണി പണിക്കർ നായികയായി അരങ്ങേറ്റം കുറിക്കുന്നു എന്നതാണ് ഈ ചിത്രത്തിന്റെ മറ്റൊരു പ്രത്യേകത. ജഗദീഷ്, അസീസ് നെടുമങ്ങാട്, സായ്കുമാർ, ശ്രീജയ തുടങ്ങിയ വലിയ താരനിര തന്നെ ചിത്രത്തിൽ അണിനിരക്കുന്നുണ്ട്. ബിബിൻ മോഹനും ജയ് വിഷ്ണുവും ചേർന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്. അടുത്തിടെ പുറത്തിറങ്ങിയ “മെല്ലവേ മെല്ലവേ” എന്ന പ്രണയഗാനം സോഷ്യൽ മീഡിയയിൽ ഇതിനോടകം തന്നെ വലിയ ശ്രദ്ധ നേടിയിട്ടുണ്ട്.
‘പൊന്മാൻ’, ‘ഗഗനചാരി’ തുടങ്ങിയ ശ്രദ്ധേയ ചിത്രങ്ങൾക്ക് ശേഷം അജിത് വിനായക ഫിലിംസ് നിർമ്മാണവും വിതരണവും ഏറ്റെടുക്കുന്ന പന്ത്രണ്ടാമത്തെ ചിത്രമാണ് ‘മധുവിധു’. ശാന്തകുമാറും മാളവിക കൃഷ്ണദാസും സഹനിർമ്മാതാക്കളായെത്തുന്ന ചിത്രം കേരളത്തിൽ സ്ട്രൈറ്റ് ലൈൻ സിനിമാസും വിദേശ രാജ്യങ്ങളിൽ ഫാർസ് ഫിലിംസുമാണ് പ്രദർശനത്തിനെത്തിക്കുന്നത്. കുടുംബപ്രേക്ഷകരെയും യുവാക്കളെയും ഒരേപോലെ തൃപ്തിപ്പെടുത്തുന്ന ഒരു ആഘോഷചിത്രമായിരിക്കും മധുവിധു എന്നാണ് അണിയറപ്രവർത്തകരുടെ പ്രതീക്ഷ.