ജെറുസലം: ഇസ്രയേൽ പൗരന്മാരെ കൊലപ്പെടുത്തുന്ന പലസ്തീൻകാർക്ക് വധശിക്ഷ നൽകാനുള്ള വിവാദ നിയമത്തിന് ഇസ്രയേൽ പാർലമെന്റ് (നെസെറ്റ്) അംഗീകാരം നൽകി. തീവ്ര വലതുപക്ഷ പാർട്ടികളുടെ ദീർഘകാലത്തെ ആവശ്യമായിരുന്ന ഈ നിയമം അന്താരാഷ്ട്ര തലത്തിൽ വലിയ പ്രതിഷേധത്തിന് വഴിതെളിച്ചിരിക്കുകയാണ്. അധിനിവേശ വെസ്റ്റ് ബാങ്കിലെ പലസ്തീൻകാരെ വിചാരണ ചെയ്യുന്ന സൈനിക കോടതികളിൽ ഇനി മുതൽ കൊലപാതക കേസുകളിൽ വധശിക്ഷ സ്ഥിരമായ ശിക്ഷാരീതിയായി മാറും എന്നതാണ് ഈ നിയമത്തിന്റെ പ്രധാന പ്രത്യേകത. ഇസ്രയേലിന്റെ നിലനിൽപ്പിനെ ചോദ്യം ചെയ്യുന്ന തരത്തിലുള്ള കുറ്റകൃത്യങ്ങൾക്ക് മാത്രമേ ഈ നിയമം ബാധകമാകൂ എന്ന് വ്യവസ്ഥയുണ്ട്.
ഈ പ്രത്യേക നിർവചനം ഇസ്രയേലിലെ ജൂത പൗരന്മാർക്ക് നിയമം ബാധകമാകാതിരിക്കാൻ വേണ്ടിയുള്ളതാണെന്നും ഇത് വ്യക്തമായ വംശീയ വിവേചനമാണെന്നും മനുഷ്യാവകാശ സംഘടനകൾ ചൂണ്ടിക്കാട്ടുന്നു. 1962-ൽ നാസി യുദ്ധക്കുറ്റവാളി അഡോൾഫ് ഐക്മാനെ തൂക്കിലേറ്റിയതിന് ശേഷം ഇസ്രയേലിൽ വധശിക്ഷ നടപ്പാക്കിയിട്ടില്ലെന്നിരിക്കെ, പുതിയ നീക്കം വലിയ രാഷ്ട്രീയ മാറ്റമായാണ് വിലയിരുത്തപ്പെടുന്നത്. ബ്രിട്ടൻ, ഫ്രാൻസ്, ജർമനി തുടങ്ങിയ യൂറോപ്യൻ രാജ്യങ്ങൾ ഇസ്രയേലിന്റെ ഈ നടപടിക്കെതിരെ കടുത്ത അതൃപ്തി രേഖപ്പെടുത്തിയിട്ടുണ്ട്. അതേസമയം, അസോസിയേഷൻ ഫോർ സിവിൽ റൈറ്റ്സ് ഇൻ ഇസ്രയേൽ ഈ നിയമത്തിനെതിരെ സുപ്രീം കോടതിയെ സമീപിച്ചിരിക്കുകയാണ്.