ചെന്നൈ: ഐ.പി.എല്ലിൽ ഡൽഹി ക്യാപിറ്റൽസിനെതിരായ മത്സരത്തിൽ ചെന്നൈ സൂപ്പർ കിംഗ്സിനായി സഞ്ജു സാംസൺ മിന്നുന്ന സെഞ്ച്വറി നേടി. ചെന്നൈ ചെപ്പോക്ക് സ്റ്റേഡിയത്തിൽ നടന്ന മത്സരത്തിൽ കേവലം 52 പന്തിൽ നിന്നാണ് സഞ്ജു നൂറ് കടന്നത്. 15 ഫോറുകളും 3 സിക്സറുകളും ഉൾപ്പെടുന്ന സഞ്ജുവിന്റെ വെടിക്കെട്ട് ഇന്നിംഗ്സിന്റെ ബലത്തിൽ ചെന്നൈ കൂറ്റൻ സ്കോറിലേക്ക് കുതിക്കുകയാണ്. 18 ഓവർ പിന്നിടുമ്പോൾ രണ്ട് വിക്കറ്റ് നഷ്ടത്തിൽ 184 റൺസ് എന്ന നിലയിലാണ് ആതിഥേയർ. 106 റൺസുമായി സഞ്ജുവും ഒരു റണ്ണുമായി ശിവം ദുബെയുമാണ് നിലവിൽ ക്രീസിലുള്ളത്.
നേരത്തെ ടോസ് നേടിയ ഡൽഹി ക്യാപ്റ്റൻ അക്സർ പട്ടേൽ ചെന്നൈയെ ബാറ്റിംഗിന് അയക്കുകയായിരുന്നു. ഓപ്പണിംഗിൽ സഞ്ജുവിനൊപ്പം ചേർന്ന ക്യാപ്റ്റൻ റുതുരാജ് ഗെയ്ക്വാദ് 15 റൺസെടുത്ത് പുറത്തായി. ഒന്നാം വിക്കറ്റിൽ ഇരുവരും ചേർന്ന് 62 റൺസാണ് കൂട്ടിച്ചേർത്തത്. തുടർന്ന് സഞ്ജുവിനൊപ്പം ക്രീസിലെത്തിയ യുവതാരം ആയുഷ് മാത്രെ മികച്ച പ്രകടനമാണ് കാഴ്ചവെച്ചത്. 36 പന്തിൽ നിന്ന് 56 റൺസ് നേടിയ മാത്രെ സഞ്ജുവിനൊപ്പം 113 റൺസിന്റെ നിർണ്ണായക കൂട്ടുകെട്ടുണ്ടാക്കിയ ശേഷം റിട്ടയേർഡ് ഔട്ടായി മടങ്ങി. പരിക്കേറ്റ എം.എസ്. ധോണി ഇല്ലാതെ ഇറങ്ങിയ ചെന്നൈ നിരയിൽ ഡിവാൾഡ് ബ്രേവിസ് തിരിച്ചെത്തിയിട്ടുണ്ട്. ഡൽഹി നിരയിൽ രണ്ട് മാറ്റങ്ങളുമായാണ് അക്സർ പട്ടേൽ ടീമിനെ ഇറക്കിയത്.