ജറുസലേം: ഇറാനിലെ നിലവിലെ ഭരണകൂടത്തെ താഴെയിറക്കാനും അവിടുത്തെ ജനങ്ങൾക്ക് സ്വന്തം വിധി നിർണ്ണയിക്കാൻ അവസരമൊരുക്കാനുമാണ് തങ്ങൾ അലി ലാരിജാനിയെ വധിച്ചതെന്ന് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു പ്രഖ്യാപിച്ചു. ഇറാന്റെ ദേശീയ സുരക്ഷാ കൗൺസിൽ മേധാവിയായ അലി ലാരിജാനിയെ വധിച്ചതായി ഇസ്രയേൽ അവകാശപ്പെടുമ്പോഴും ഇറാൻ ഭരണകൂടം ഇതുവരെ ഈ വാർത്തയോട് ഔദ്യോഗികമായി പ്രതികരിച്ചിട്ടില്ല.
ടെലിവിഷനിലൂടെ നടത്തിയ പ്രസ്താവനയിൽ, ഇറാന്റെ സൈനിക ശക്തിയായ റെവല്യൂഷണറി ഗാർഡുകളെ കുറ്റവാളി സംഘങ്ങൾ എന്ന് വിശേഷിപ്പിച്ച നെതന്യാഹു, ആ സംഘത്തിന്റെ തലവനെയാണ് ഇന്ന് രാവിലെ ഇല്ലാതാക്കിയതെന്നും കൂട്ടിച്ചേർത്തു. ഇറാനിലെ പുരോഹിത ഭരണകൂടത്തെ സ്ഥാനഭ്രഷ്ടരാക്കുക എന്നത് അത്ര എളുപ്പത്തിൽ സംഭവിക്കുന്ന ഒന്നല്ലെന്ന് നെതന്യാഹു സമ്മതിച്ചു.
എന്നാൽ ഇസ്രയേൽ ഇത്തരം നിരന്തരമായ ശ്രമങ്ങൾ തുടരുന്ന പക്ഷം, ഇറാനിലെ ജനങ്ങൾക്ക് അവരുടെ ഭരണാധികാരികളെ മാറ്റാനുള്ള സാഹചര്യം കൈവരുമെന്നാണ് അദ്ദേഹത്തിന്റെ വാദം. ഇറാന്റെ രാഷ്ട്രീയ-സൈനിക തലപ്പത്തെ അതികായനായിരുന്ന 68-കാരനായ അലി ലാരിജാനി, കൊല്ലപ്പെട്ട പരമോന്നത നേതാവ് അയത്തുള്ള അലി ഖമേനിയുടെ ഏറ്റവും അടുത്ത വിശ്വസ്തനായിരുന്നു. യുദ്ധം തുടങ്ങിയത് മുതൽ അമേരിക്കയ്ക്കും ഇസ്രയേലിനുമെതിരെ കടുത്ത ഭാഷയിൽ വിമർശനങ്ങൾ ഉന്നയിച്ചിരുന്ന അദ്ദേഹം കഴിഞ്ഞയാഴ്ചയും ഇറാനിലെ പൊതുറാലിയിൽ സജീവമായിരുന്നു. ലാരിജാനിയുടെ വധം പശ്ചിമേഷ്യയിലെ യുദ്ധസാഹചര്യത്തെ കൂടുതൽ സങ്കീർണ്ണമാക്കുമെന്നാണ് വിലയിരുത്തപ്പെടുന്നത്.