മലയാള സിനിമയിലെ എക്കാലത്തെയും വലിയ ദൃശ്യവിസ്മയമെന്ന് വിശേഷിപ്പിക്കപ്പെടുന്ന ‘പേട്രിയറ്റ്’ റിലീസിന് തയ്യാറെടുക്കുന്നു. മമ്മൂട്ടിയും മോഹൻലാലും 18 വർഷത്തെ ഇടവേളയ്ക്ക് ശേഷം ഒരുമിക്കുന്നു എന്നതാണ് ഈ ചിത്രത്തിന്റെ ഏറ്റവും വലിയ സവിശേഷത. മെയ് ഒന്നിന് ആഗോളതലത്തിൽ റിലീസ് ചെയ്യാനിരിക്കുന്ന ചിത്രത്തിന്റെ ട്രെയ്ലർ കഴിഞ്ഞ ദിവസം പുറത്തിറങ്ങി. ഇന്ത്യൻ സിനിമയിൽ തന്നെ ആദ്യമായി മമ്മൂട്ടിയും മോഹൻലാലും ഒരേസമയം രണ്ട് വ്യത്യസ്ത നഗരങ്ങളിലെ തിയേറ്ററുകളിൽ ആരാധകർക്കൊപ്പം ചേർന്നാണ് ട്രെയ്ലർ ലോഞ്ച് നിർവ്വഹിച്ചത്.
മഹേഷ് നാരായണൻ രചനയും സംവിധാനവും എഡിറ്റിംഗും നിർവ്വഹിക്കുന്ന ഈ ആക്ഷൻ സ്പൈ ത്രില്ലറിൽ ഫഹദ് ഫാസിൽ, കുഞ്ചാക്കോ ബോബൻ, നയൻതാര തുടങ്ങി വലിയൊരു താരനിര തന്നെയുണ്ട്. അന്താരാഷ്ട്ര നിലവാരത്തിലുള്ള സാങ്കേതിക മികവോടെ ഒരുക്കിയ ചിത്രം മലയാളത്തിലെ ഏറ്റവും വലിയ ബജറ്റിലാണ് നിർമ്മിച്ചിരിക്കുന്നത്. ഇന്ത്യ, ശ്രീലങ്ക, യു.കെ, അസർബെയ്ജാൻ, യുഎഇ എന്നിങ്ങനെ പത്തിലധികം രാജ്യങ്ങളിലായി ഒരു വർഷത്തിലേറെ നീണ്ട ചിത്രീകരണത്തിനൊടുവിലാണ് സിനിമ പൂർത്തിയായത്.
ആന്റോ ജോസഫ് ഫിലിം കമ്പനിയുടെയും കിച്ചപ്പു ഫിലിംസിന്റെയും ബാനറിൽ നിർമ്മിച്ചിരിക്കുന്ന ഈ ചിത്രത്തിന് മനുഷ് നന്ദനാണ് ഛായാഗ്രഹണം നിർവ്വഹിച്ചിരിക്കുന്നത്. ട്രെൻഡ് സെറ്റർ സംഗീത സംവിധായകൻ സുഷിൻ ശ്യാമാണ് സംഗീതം ഒരുക്കിയിരിക്കുന്നത്. സ്പൈ ത്രില്ലർ വിഭാഗത്തിൽ പെടുന്ന ചിത്രത്തിൽ മമ്മൂട്ടിയുടെയും മോഹൻലാലിന്റെയും വമ്പൻ ആക്ഷൻ രംഗങ്ങളാണ് പ്രധാന ആകർഷണമെന്ന് നേരത്തെ പുറത്തുവന്ന ടീസറുകൾ സൂചിപ്പിച്ചിരുന്നു.
വിവിധ രാജ്യങ്ങളിലെ പത്തിലധികം ഷെഡ്യൂളുകളിലായി ചിത്രീകരിച്ച ‘പേട്രിയറ്റ്’ മലയാള സിനിമയിൽ ഇതുവരെ കാണാത്ത വലിയൊരു കാൻവാസിനെയാണ് പ്രേക്ഷകർക്ക് മുന്നിലെത്തിക്കുന്നത്. ചിത്രത്തിലെ താരങ്ങളുടെ ഫസ്റ്റ് ലുക്ക് പോസ്റ്ററുകളും മേക്കിംഗ് വീഡിയോകളും ഇതിനകം തന്നെ സോഷ്യൽ മീഡിയയിൽ തരംഗമായിക്കഴിഞ്ഞു. ആൻ മെഗാ മീഡിയ പ്രദർശനത്തിനെത്തിക്കുന്ന ചിത്രം കേരളത്തിലെ തിയേറ്ററുകളിൽ വലിയ വിപ്ലവം സൃഷ്ടിക്കുമെന്നാണ് സിനിമാ ലോകം വിലയിരുത്തുന്നത്.