ന്യൂഡൽഹി: കേന്ദ്രത്തിൽ നരേന്ദ്ര മോദി സർക്കാർ 12 വർഷത്തെ ഭരണകാലം പൂർത്തിയാക്കുന്നതിനോട് അനുബന്ധിച്ച് രാജ്യവ്യാപകമായി വിപുലമായ പ്രചാരണ പരിപാടികൾക്ക് ബിജെപിയും കേന്ദ്രസർക്കാരും രൂപം നൽകുന്നു. വിവിധ മേഖലകളിലെ ഭരണനിർവഹണം, ജനക്ഷേമ പദ്ധതികൾ, അടിസ്ഥാന സൗകര്യ വികസനം, ദേശീയ സുരക്ഷ എന്നിവയിൽ സർക്കാർ കൈവരിച്ച ചരിത്രപരമായ നേട്ടങ്ങൾ ജനങ്ങളിലേക്ക് എത്തിക്കുകയാണ് ഈ കാമ്പയിന്റെ ലക്ഷ്യം.
കേന്ദ്രമന്ത്രിമാർ, ബിജെപി മുഖ്യമന്ത്രിമാർ, എംപിമാർ, മറ്റ് മുതിർന്ന നേതാക്കൾ എന്നിവർ വരും ആഴ്ചകളിൽ രാജ്യത്തുടനീളം സഞ്ചരിച്ച് പത്രസമ്മേളനങ്ങൾ, പൊതുയോഗങ്ങൾ, മാധ്യമ സംവാദങ്ങൾ എന്നിവയിലൂടെ സർക്കാരിന്റെ പ്രവർത്തന റിപ്പോർട്ട് ജനങ്ങൾക്ക് മുന്നിൽ അവതരിപ്പിക്കും. അഞ്ച് പ്രധാന വിഷയങ്ങളെ അടിസ്ഥാനമാക്കിയാണ് ഈ പ്രചാരണ പരിപാടി രൂപകൽപ്പന ചെയ്തിട്ടുള്ളതെന്നും ആശയവിനിമയത്തിനായി 22 ശ്രദ്ധേയമായ മേഖലകൾ കണ്ടെത്തിയിട്ടുണ്ടെന്നും പാർട്ടി വൃത്തങ്ങൾ വ്യക്തമാക്കി.
ദരിദ്രർ, കർഷകർ, ഇടത്തരക്കാർ എന്നിവർക്കായി നടപ്പാക്കിയ ആരോഗ്യ സേവനങ്ങളും ക്ഷേമപദ്ധതികളും ഇതിൽ ഉൾപ്പെടും. സ്ത്രീ ശാക്തീകരണം, യുവജന സംരംഭങ്ങൾ, പിന്നോക്ക വിഭാഗങ്ങൾക്കും കർഷകർക്കും വേണ്ടിയുള്ള ക്ഷേമ നടപടികൾ എന്നിവയ്ക്ക് ഊന്നൽ നൽകും. രാജ്യത്തിന്റെ സാമ്പത്തിക വളർച്ച, ഡിജിറ്റൽ ഭരണം, അടിസ്ഥാന സൗകര്യ വികസനം, ശാസ്ത്ര സാങ്കേതികവിദ്യ, വടക്കുകിഴക്കൻ സംസ്ഥാനങ്ങളിലെ വികസനം എന്നിവ എടുത്തുകാണിക്കും. ദേശീയ സുരക്ഷാ നയങ്ങൾ, വിദേശ നയം, ഭീകരവാദ വിരുദ്ധ പ്രവർത്തനങ്ങൾ, നക്സലിസത്തിനെതിരായ ശക്തമായ നടപടികൾ എന്നിവ വിശദീകരിക്കും. പൈതൃക സംരക്ഷണം, സംസ്കാരം, പരിസ്ഥിതി, വന്യജീവി സംരക്ഷണം എന്നിവയിലെ നേട്ടങ്ങൾ ഇതിലൂടെ പങ്കുവെക്കും.
മുൻ സർക്കാരുകളുടെ പ്രവർത്തനങ്ങളുമായി താരതമ്യം ചെയ്ത് ബിജെപിയുടെ ഭരണ മികവ് ഊട്ടിയുറപ്പിക്കുന്നതിനായി കൃത്യമായ ഡേറ്റയും മുഖ്യപദ്ധതികളുടെ വിവരങ്ങളും മന്ത്രിമാർ ജനങ്ങൾക്ക് മുന്നിൽ അവതരിപ്പിക്കും. തൊഴിലില്ലായ്മ, പണപ്പെരുപ്പം എന്നിവ ഉയർത്തിയുള്ള പ്രതിപക്ഷത്തിന്റെ വിമർശനങ്ങളെ പ്രതിരോധിക്കാൻ ഹൈവേ-റെയിൽവേ വികസനം, ഇന്ത്യയുടെ ആഗോള സ്ഥാനം, ഡിജിറ്റൽ ഭരണം എന്നിവയുടെ കണക്കുകൾ ബിജെപി ആയുധമാക്കും. വരാനിരിക്കുന്ന നിർണായക തിരഞ്ഞെടുപ്പുകൾക്ക് മുന്നോടിയായി ഈ പ്രചാരണ പരിപാടിയെ വളരെ പ്രാധാന്യത്തോടെയാണ് പാർട്ടി നേതൃത്വം കാണുന്നത്. മാധ്യമ ബ്രീഫിങ്ങുകൾ, ജില്ലാ തലത്തിലുള്ള പ്രചാരണങ്ങൾ, സോഷ്യൽ മീഡിയ കാമ്പയിനുകൾ, സർക്കാർ പദ്ധതികളുടെ ഗുണഭോക്താക്കളുമായുള്ള നേരിട്ടുള്ള സമ്പർക്കം എന്നിവയും ഇതിന്റെ ഭാഗമായി നടക്കും.